Давлат хавфсизлик хизмати томонидан ўтказилган тезкор тадбирда Сирдарё вилоятида судья ва банк мансабдорининг ноқонуний ҳаракатларига чек қўйилди.
Маълум қилинишича, иқтисодий ишлар бўйича судья ўз иш юритувида бўлган даъво ишини тадбиркор фойдасига ҳал бўлишини билган ҳолда, “Агробанк” филиали ходими билан тил бириктириб, 7500 АҚШ доллари талаб қилган.
Тезкор тадбир давомида банк ходими 5500 доллар пулни олгани ва унинг бир қисмини судьяга берган вақтида ушланган.
Ҳозирда мазкур ҳолат юзасидан жиноят иши қўзғатилиб, дастлабки тергов ҳаракатлари олиб борилмоқда. Фуқароларга шу каби ҳолатларга дуч келганда тегишли идораларга хабар бериш тавсия этилди.
