Покистон назорати остидаги Кашмир ҳудудида оммавий иш ташлаш эълон қилиниб, минтақада ҳаёт деярли тўхтаб қолди. Сўнгги икки ҳафтадан буён давом этаётган намойишлар ва тўқнашувларда камида 24 нафар киши ҳалок бўлган. Бу ҳақда Reuters агентлиги хабар берди.
Қайд этилишича, можаро маҳаллий ҳукумат ва фаолияти яқинда тақиқланган “Бирлашган Авоми Ҳаракат Қўмитаси” (JAAC) тарафдорлари ўртасида юзага келган. Вазият Исломобод учун сиёсий жиҳатдан нозик масалага айланган. Чунки Покистон расмийлари йиллар давомида Ҳиндистон назоратидаги Кашмирда намойишчиларга нисбатан қўлланилаётган чораларни танқид қилиб келган.
Норозилик намойишлари 27 июль куни бўлиб ўтиши режалаштирилган қонунчилик ассамблеяси сайловлари арафасида бошланган. Намойишчилар ҳукуматнинг ассамблеядаги 45 ўриндан 12 тасини Ҳиндистон назоратидаги Кашмирдан кўчиб келган қочқинлар учун ажратиш қарорига қарши чиқмоқда.
Расмий маълумотларга кўра, 6 июндан 14 июнгача бўлган даврда камида 20 нафар тинч аҳоли вакили ҳалок бўлган. Минтақа полицияси раҳбари Лиёқат Али Маликнинг билдиришича, тўқнашувларда яна тўрт нафар полиция ходими ҳалок бўлган, 97 нафари жароҳатланган. Шунингдек, 515 нафар шахс қўлга олинган.
Ҳозирда JAAC тарафдорларининг минглаб аъзолари Равалакот шаҳри яқинида лагер ташкил қилган. Бунга жавобан ҳукумат асосий автомобиль йўлларини ёпган, интернет алоқасини ўчирган ва оммавий ахборот воситалари фаолиятига чекловлар жорий этган.
Шатдаун оқибатида иқтисодий фаоллик ҳам издан чиққан. Музаффаробод шаҳридаги савдо нуқталарининг аксарияти ёпилган, банк хизматлари тўхтатилган ва ёнилғи қуйиш шохобчалари фаолияти чекланган.
