Президент Шавкат Мирзиёев аҳолини ижтимоий қўллаб-қувватлаш, хизматлар сифатини ошириш ва қонунчиликни такомиллаштиришга қаратилган таклифларни маъқуллади. Ушбу ташаббуслар доирасида қатор янги ижтимоий хизматлар ва имтиёзлар жорий этилади.
Тақдимотда ижтимоий ҳимоя тизимини янги босқичга олиб чиқиш, эҳтиёжманд фуқароларга манзилли ёрдамни кучайтириш, хизматларни рақамлаштириш ва проактив шаклга ўтказиш бўйича режалар белгиланди. Хусусан, 2026 йилдан бошлаб руҳий ҳолатида бузилишлари мавжуд шахслар учун “Янги кун” кундузги парвариш, уй шароитида қараб туриш, “Мадад” уйи ва “Ижтимоий таътил” каби хизматлар босқичма-босқич йўлга қўйилади.
Шунингдек, 0–3 ёшда ривожланишида нуқсонлар аниқланган болалар учун “Эрта аралашув” хизмати жорий этилиб, махсус педагогик ва реабилитацион ёрдам кўрсатилади. Янги хизматлар асосан давлат-хусусий шериклик орқали ташкил этилади ва уларнинг харажатлари давлат томонидан субсидия қилинади.
2026 йил 1 сентябрдан эса оғир даражадаги ногиронлиги бўлган шахсларга қараётган қонуний вакиллар учун янги ҳар ойлик парваришлаш нафақаси жорий этилади. Бундан ташқари, кундузги парвариш хизматларидан фойдаланувчи ота-оналарга солиқ имтиёзлари бериш, тадбиркорларни эса 2030 йилгача солиқдан озод қилиш режалаштирилмоқда.
Қонунчиликда ҳам муҳим ўзгаришлар кўзда тутилган: ногиронлик бўйича камситиш учун жавобгарлик кучайтирилади, ижтимоий хизматлар ягона реестр орқали манзилли йўналтирилади. Шу билан бирга, болалар ва аёлларни ҳимоя қилиш, жумладан, зўравонлик ва ноқонуний контентга қарши чораларни кучайтиришга қаратилган нормалар ҳам киритилади.
Президент ушбу таклифларни маъқуллаб, тегишли қонун ҳужжатларини имзолади.
