Ҳақиқий исми Стивен Пауль Жобс бўлган дунёга машхур АҚШлик мухандис, тадбиркор, Apple компаниясининг асосчиси Стив Жобс ҳаёт бўлганида бугун 60 ёшни қарши олган бўларди.
Стивен Жобс 1955 йилнинг 24 февраль куни, Калифорния штатидаги Маунтин-Вью шаҳарчасида дунёга келган. Стивнинг онаси уни ана шу оилага бериб юборгач у ўз ота-онаси билан эмас, балки Пол ва Клара Жобсларнинг оиласида вояга етади.
Мактабда, ўқувчилик даврларидаёқ электроникага қизиққан Стив ўз дўсти Стив Возняк билан танишади ва кейинчалик Возняк Жобснинг Apple’даги ҳамкасбига айланади.
Икки Стив биргаликда BlueBox номли узоқ масофадаги жойларга бепул телефон қўнғироғини амалга ошириш имконини берувчи қурилмани яратишади. Бу уларнинг биринчи ишлари эди. Маълумотларга кўра, айнан ана шу қурилма схемаси асосида улар ўз бизнесларини ривожлантиришган. Стив Возняк ушбу қурилмаларни яратиш Жобс эса уларни сотиш билан шуғулланишган. 1972 йили мактабни тамомлагач, Стив Жобс Орегон штати, Портленд шаҳарчасидаги Рид коллежига ўқишга киради. Биринчи босқичдан сўнг у ушбу коллеждан ўз хоҳишига кўра ўқишдан четлаштирилган. Ана ўша вақтларда у каллиграфия бўйича ўқув курсларига қатнай бошлайди ва бунинг натижасида у MacOS системасини яратиш фикри пайдо бўлади.
Бундан сўнг уни Atari’га ишга олиб киришади. Орадан 5 йил ўтиб, 1976 йилнинг 1 апрелида Стив Жобс ва Стив Возняк “Apple” компаниясига асос солишади. Кўплаб ғоялар муаллифи Возняк бўлганлиги сабабли Жобс маркетолог сифатида фаолият юритарди.
1986 йили Жобс Apple’даги акцияларининг кўп қисмини сотиб, NeXT Computer компаниясига асос солади. 2000 йилда эса у Pixar номли анимацион студиясини яратади.
Айтиш лозимки, ушбу студия раҳбарлигида “Ўйинчоқлар воқеаси”, “Кариб денгизи қароқчилари 2”, “Маҳлуқлар бирлашмаси” каби фильмлар яратилган. 2006 йили Стив Жобс Pixar студиясини Walt Disney компаниясига 7,4 миллиард АҚШ долларига сотиш баробарида Walt Disney компанияси акцияларининг 7 фоизига эга бўлди.
2001 йили Стив Жобс илк iPod плеерини ячратди. Бир неча йил ўтиб, iPod савдоси компания даромадининг асосини ташкил этди.
Компания томонидан 2006 йили Apple TV плеери, 2007 йили iPhone уяли алоқа воситалари сотувга чиқарилди, 2008 йили эса Жобс дунёдаги энг ингичка MacBook Air номли ноутбукни омма эътиборига ҳавола қилган.
Стив Жобс ишга шу қадар муккасидан кетган эдики, баъзида оиласи ва фарзандлари борлиги ҳам ёдидан чиқиб қоларди...
Стив Жобс 4 фарзанднинг отаси. 1978 йили Жобснинг илк фарзанди Лиза Бреннан-Жобс дунёга келган.
У бир неча йил давомида бепушт эканини айтиб, ўз қизини тан олмаган, бироқ йиллар ўтиб у айбини тан олган.
1991 йилнинг 18 мартида Стив Жобс Лорен Пауэллга уйланади. Кейинчалик уларнинг оиласида ўғиллари Рид Пол (1991 йил) ва яна икки қизалоқ Эрин Сиена (1995 йил) ҳамда Ева (1998 йил)лар дунёга келди.
2003 йили унга ошқозон ости бези саратони ташхиси қўйилди. Бироқ омадли инсонлар сафида 2004 йили ушбу касаллик юзасидан ўтказилган жарроҳлик амалиётини муваффақиятли ўтказди. Ана шу жарроҳлик амалиёти унинг ҳаётини бир неча йилга узайишига сабаб бўлди.
“Мен ҳеч қачон ўлимга бу қадар яқин турмаганман. Ўйлайманки яна бир неча ўн йил унга яқинлашмайман” деган эди Стив Жобс ўшанда.
2011 йилнинг 5 октябрь санасида Стив Жобс нафас етишмаслиги натижасида оламдан ўтди.
