Yulduz Usmonova "Zo`r.tv"ning jonli efiridagi konsertida gapirgan nutqi yozilgan videolavhalar ijtimoiy tarmoqlarda tarqab, noo`rin keltirgan maqoli tufayli ko`pchilikning muhokamasiga sabab bo`ldi. Video:
Bu videoni ko`rgan blogerlar va boshqa bir qator tarmoq foydalanuvchilari honandaning nuqtai nazari, madaniyati va doimgiday yana "qovun tushirib" aytgan gaplari yuzasidan o`z fikr-mulohazalarini bildirmoqdalar. Xususan, "Antidimedrol" kanalida quyidagi fikrlar bayon qilingan.
"Yulduz Usmonova telekanal orqali onlayn uzatilgan konsertida "Pulni pul topadi, axmoq ketmon chopadi" debdi. Rosti ko`nglim og`ridi, ketmon chopib katta bo`lgan ota-onamning, eshon bobomning haqqi hurmati og`rindim shu gapga... Oddiy hunarmand ustaning farzandiman, onam bog`chada ishlaganlar. 14 yoshimdan kolxozga chiqib ishladim. Bog`da ishladim. Er ekardik, qizilcha, loviya, makka, kartoshka... deganday. Eshon bobomning qo`ylariga o`t tashirdim, qishga xashak zahira qilardim. Duolarini olganman.
Shu paytda kolxozdan 30 so`m oylik olardim. Bir qop un 12 so`m, bir kg go`sht 4-5 so`m edi. Paxta terib qishki kiyimlarni olardik. Onam doim "mehnatdan nomus qilma, qora mehnatning noni oq bo`ladi"-derdilar.
Institutda o`qiganimda Toshkentdagi amakimning yordamlari bilan bir tashkilotda kechasi qorovullik qilib, yonidagi tashkilotda yarim stavka birinchi qavatni polini yuvardim. Dvornik bo`lib, tashkilotning hovlisini ham supurganman. Lekin oyliklarim stipendiyamni 4-5 barobarini tashkil qilardi. Ukam ikkalamiz eb ichish, kiyishdan qiynalmay o`qiganmiz. Xolodilnik to`la turardi.
Otam omadli hunarmand bo`lganlar, topish tutishlari yaxshi edi, 7-8 yil gektarlab piyoz ekib uy-joy, to`ylar qildilar, bizlarni o`qitdilar.
Bizni o`qitishga, boqishga pullari etsayam, bizni mehnatda chiniqtirdilar. Hech yo`q kibr bo`lmaydi, o`ziyam kam bo`lmaydi deydilar.
Hozir davlatni ishida ishlayman, ukam bilan qulupnay ekamiz, borganda yordamlashaman. Har yilgi daromad ota-onamning ro`zg`origa etib, ortganiga yana nimalardir qilishadi. O`tgan yilgi daromaddan uyning oldiga do`kon qurdi ukam, bu yilgisi bilan ichini to`ldirib ish boshladi. Lekin erniyam ekyapti. Kepmon chopgan axmoq bo`lmaydi!" deb yozmoqda muallif.
Ba`zan madaniyat sohasida non topib, eb yurganlarning madaniyatsiz, tuturuqsiz gaplaridan odamning dili og`riydi. Ularga mikrofonni qo`shiq aytganida berib, boshqa paytda o`chirib qo`yish kerakmikаn?..