Xabaringiz bor, deputat Rasul Kusherbaev va “UzAutoMotors” AJ o`rtasida so`nggi vaqtlar qizg`in bahs ketmoqda. Kusherbaev tomonidan kompaniyaga nisbatan bildirilayotgan tanqidlar, O`zbekistonda yagona — monopol tashkilot uchun kuchli zarba bo`layotgan bo`lsa, ajabmas. Ayni paytda “UzAutoMotors” AJ O`zbekiston Respublikasi Oliy Majlisi Qonunchilik palatasining Odob komissiyasiga deputat Rasul Kusherbaev ustidan shikoyat xati yuboribdi. Bu haqda deputat Doniyor G`aniev ma`lum qilmoqda va o`z manosabatini ham bildirib o`tgan:
"Shikoyatda iddao etilishicha Kusherbaev kompaniya va uning faoliyati haqida asossiz fikrlar bildirish orqali “UzAutoMotors”ning "ishchanlik obro`siga" putur etkazganmish (yo`q obro`ga qanday putur etkazish mumkin hayronman).
Kecha O`zbekiston Liberal-demokratik partiyasining Oliy Majlis Qonunchilik palatasidagi siyosiy fraksiyasi yig`ilishida ushbu shikoyat xati ko`rib chiqildi. Unda fraksiyaning barcha deputatlari bir ovozdan Kusherbaevni qo`llab-quvvatlashdi. Zero, “UzAutoMotors” AJ haqida Kusherbaevning bildirilgan fikrlari qanchalik haqiqatga yaqinligini unga bulgan xalqning munosabati ko`rsatib turibdi.
“UzAutoMotors” AJ esa yillar davomida davlatning o`nlab trillion so`mlik imtiyoz va prefensiyalaridan foydalangani, iste`molchilar huquqlarini doimiy kamsitib kelgani etmaganidek, endi unga nisbatan xalqning, deputatlarning, jamoatchilikning tanqidlarini rad etib, o`zi tushib olgan ko`lmakdan chiqishni istamasligi bu kompaniyaning qanchalar yuzsiz ekanligini ko`rsatib qo`ydi.
Qolaversa, bir necha kun avval Monopoliyaga qarshi kurashish qo`mitasining “UzAutoMotors” AJ faoliyatiga oid tekshiruvi natijalari bo`yicha maxsus komissiyasi muhokama yig`ilishida kompaniyaning bir qancha kirdikorlari oshkor bo`lgan edi. Yig`ilishda ko`tarilgan masalalar yakuniga ko`ra kompaniya 2020 yilda avtomobil tannarxlarini shakllantirishda jami 1,1 trln.so`mdan ko`proq asossiz xarajatlar hisoblanganligi tekshiruv davomida aniqlangan. Bu esa o`rtacha hisoblaganda har bir avtomobil tannarxi kamida 4-5 mln.so`mgacha asossiz oshirilganini anglatadi.
Shunday ekan, "UzAutoMotors” AJ deputat ustidan shikoyat qilib, gapni aylantirguncha Monopoliyaga qarshi kurashish qo`mitasi tomonidan aniqlangan 1,1 trln.so`m bo`yicha aniq faktlar asosida hisob bersa yaxshi bo`larmidi?
Kusherbaev ham deputat, ham fuqaro sifatida o`zining konstitusiyaviy huqularidan foydalangan holda o`z fikrini bildirdi. “UzAutoMotors” AJ esa uning bu huquqlaridan foydalanganligini qoralamoqda. Bu esa muhtaram prezidentimiz rahbarligida olib borilayotgan siyosiy o`zgarishlar, xususan mamlakatda so`z erkinligini ta`minlash, kuchli demokratik davlat qurish yo`lidagi islohotlarga ziddir.
Agar bu gaplarim bilan men ham "UzAutoMotors”ning "obro`siga putur etkazib, ularning paxtadek yumshoq ko`ngliga ozor bergan bo`lsam", iltimos ovora bo`lib shikoyat yuborib yurishmasin. O`zim oldindan uzr so`rab qo`ya qolaman",
— deyiladi G`aniev mulohazalarida.
Mavzuga doir: