Navoiy viloyati hududining asosiy qismi cho`l yalangliklariga to`g`ri keladi. Lekin bozor iqtisodiyoti sharoiti har narsadan daromad qilishga undaydi kishini. Viloyatning Qiziltepa tumanidagi bugun “Yangi asr” fermer xo`jaligi joylashgan hudud ham bir paytlar foydalanilmagan er bo`lgan, qachonki sigirlar “saltanati”ga aylanguniga qadar. Bu “saltanat”ning esa maqola qilinishida etarli asos bor. Buni esa maqolani o`qib bilib olasiz.
Fermer xo`jaligi nimasi bilan ahamiyatli?
Ishga tushirilganiga endigina bir yil bo`lgan “Yangi asr” fermer xo`jaligi bugun yirik klasterga aylangan. Bu erda jami 125 ta hodim faoliyat olib borayotgan bo`lsa, shundan 32 nafari kam ta`minlangan oilalar a`zolaridir. Demak, bir paytlar quruq cho`l bo`lgan hududda yirik klasterni tashkil etgan tadbirkor tashabbusi bilan bugun bir necha o`nlab oilalar qora qozoni qaynayapti. Mana tadbirkorlar nima uchun kerak! Mamlakatimizda tadbirkorlar uchun katta imkoniyatlar tizimi shakllantirilmoqda. Ular ishlasa, faoliyati kengaysa, yangi ish o`rinlari yaratiladi. Kambag`allik bilan kurashishda ham tadbirkorlar sinfining ahamiyati katta. Mazkur fermer xo`jaligi esa aholini faqat ish bilan ta`minlash bilangina cheklanib qolmagan.
“Sigirlardan 99 % urg`ochi buzoqlar tug`iladi”
“Fermer xo`jaligimizda bugungi kunda 2000 ga yaqin sigirlar parvarish qilinmoqda. Har bir sigir kunlik o`rtacha 25-27 litr sut beradi. 105 litr rekord darajada sut bergani ham bo`lgan. Sigirlar asosan Germaniya, Daniya va Estoniyadan olib kelinadi. Biz faqat urg`ochi qora mollar parvarishi bilan shug`ullanamiz. Sun`iy urug`lantirish orqali sigirlardan 99 % urg`ochi buzoqlar tug`iladi. Kunlik 40 tonnagacha olinadigan sutdan sutni qayta ishlash seximizda 20 dan ortiq mahsulotlar tayyorlanadi”, - deydi “Yangi asr” fermer xo`jaligi rahbari Jobir Temirov. Uning ta`kidlashicha, u erda ishlovchi hodimlar 1 mln.dan 3 mln. so`mgacha oylik maosh olishadi.
Fermer xo`jaligiga ishga qabul qilingan 32 nafar kam ta`minlanganlardan tashqari tadbirkor yaqin hududlarda imtiyozli kreditlar asosida sigirlar sotib olgan aholidan kunlik sog`ilgan sutlarni ham yig`ishtirib oladi. Bu esa sigirlarni sotib olganlarda kunlik 25-27 litr sutni qaerga sotsam ekan, degan hayollardan forig` qiladi. Xullas, o`z ishini bilgan tadbirkor ham o`z biznesini yuritadi, ham ishsizlarni ish bilan ta`minlaydi, ham davlat byudjetiga yaxshigina soliq ham to`laydi. Natijada hamma manfaatdor.
Sardorbek Rahmonqulov
