Bu hodisa haqida FVV Matbuot xizmati xabar bermoqda.
Ma`lum bo`lishicha, YTH natijasida fuqaroning halok bo`lishi bilan bog`liq vaziyat 10 sentyabr kuni Namangan viloyatining Chortoq tumanida sodir bo`lgan. Keskin burilishda «KOBALT» avtomashinasining haydovchisi boshqaruvni yo`qotib, avtomobil bir necha marta ag`darilgan va yaqin atrofdagi «Namangan» kanaliga tushib ketgan. Avtomobil ag`darilgan vaqtdagi kuch haydovchini mashinadan uloqtirib yuborgan va u voqea joyida vafot etgan. Shuningdek, mashina salonida yana bir nafar ayol kishi bo`lgan. U esa allaqachon suv ostida qolgan mashinadan xavfsiz chiqib ketishga muvaffaq bo`lgan.
Bir necha daqiqadan so`ng voqea joyiga Namangan viloyati Favqulodda vaziyatlar boshqarmasi qutqaruvchilari etib kelib, tegishli amaliy choralar ko`rildi.
Jabrlanuvchi kasalxonaga etkazildi. Mashina esa maxsus texnikalar yordamida kanaldan olib chiqilgan, deyiladi xabarda.
