Namanganda 50 gektar maydonga “Organik hudud” tashkil qilish va mahsulotlarini qayta ishlash loyihasini amalga oshirish rejalashtirilgan. Yangiqo`rg`on tumani Iskovot agrofirmasi hududida joylashgan “Valley Fruits” MChJga qarashli mevani qayta ishlab chiqarish loyihasi kooperasiya usulida tashkil etilgan bo`lib, bu erda yiliga 2,5 ming tonna meva mahsulotlari quritilib, ichki va tashqi bozorga eksport qilinmoqda. Bu haqda qishloq xo`jaligi vazirligi axborot xizmati xabar berdi. Hozirgi kunda 10 nafar tadbirkor birlashib, kooperasiya usulida faoliyat olib bormoqda. Mavsumiy 50-60 nafar xotin-qizlar ish bilan ta`minlangan. Kooperasiya rahbari Zuhriddin Hoshimovning aytishicha, meva-sabzavotni qayta ishlash, quritish, qadoqlash, eksport qilish va ko`chatchilik yo`nalishlari faoliyat ko`rsatmoqda. Ayni paytda 2500 tonna tayyor mahsulotni saqlash uchun muzlatkich qurilmoqda. Ishlab chiqarish jarayonida, asosan, olma va xurmoni qayta ishlash va saralash ishlari olib borilmoqda. Hozirgi vaqtda viloyatda 807 ta oziq-ovqat mahsulotlarini ishlab chiqaruvchi korxonalar mavjud bo`lib, jumladan, 188 ming tonna meva-sabzavotlarni qayta ishlash quvvatiga ega 64 ta korxona faoliyat olib bormoqda.
