G`uzorlik Shamsiddin Mahmudov topib olgan antiqa yarador qush "Qizil kitob"ga kiritilgan bo`lib chiqdi

G`uzorlik Shamsiddin Mahmudov uni daladan topib oladi va uyiga olib keladi. Keyinchalik aniqlanishicha noodatiy qush "Qizil kitob"ga kiritilgan bo`lib chiqdi.

-Bugun tushga yaqin daladan xabar olish uchun borganimda yarador holda ucholmay turgan qush topib oldim, - deydi g`uzorlik Shamsiddin Mahmudov. -Keyin uni uyga olib keldim. Oyog`ida raqamlangan belgi va uzuksimon xalqalar borligini ko`rib uni boshqa erdan kelib qolganini tushundim. Unga nima berishni ham bilmadik, ochig`i.

Shamsiddin Mahmudov bu turdagi qushni avval ko`rmaganligi bois,  Qashqadaryo viloyat ekologiya va atrof muhitni muhofaza qilish boshqarmasiga xabar beradi.

-Xabarga asosan xonadonga kelganimizda haqiqatdan ham yarador qush borligiga guvoh bo`ldik. -deydi Qashqadaryo viloyat ekologiya va atrof muhitni muhofaza qilish boshqarmasi bo`lim boshlig`i Azizbek Qurbonov. - Dastlabki o`rganishlardan so`ng qushning O`zbekiston "Qizil kitobiga" hamda Tabiatni muhofaza qilish xalqaro "Qizil kitobiga kiritilgan "Yo`rg`a tuvaloq" qushi ekanligi aniqlandi. Qushning yaradorligini inobatga olib, parvarishlash va kelgusida tabiat bag`riga qo`yib yuborish maqsadida poytaxtdagi hayvonot bog`iga jo`natish choralari ko`rildi.

Qashqadaryo viloyatidan maxsus muxbirimiz Shavkat Aminov