O`zbek tili endi Vengriyada ham o`rganiladi. Vengriyaning etakchi universiteti bilan kelishuvga erishildi, deya xabar bermoqda Oliy va o`rta maxsus ta`lim vazirligi.
Ma`lum qilinishicha bu kelishuvga 16-17 fevral kuni Budapesht shahrida O`zbekiston-Vengriya hukumatlararo komissiyaning navbatdagi yig`ilishi davomida erishilgan. Unda O`zbekiston Respublikasi Bosh vaziri o`rinbosari S.Umurzakov boshchiligidagi O`zbekiston Respublikasi hukumat delegasiyasi qatnashdi.
Muzokaralarda shuningdek, Oliy va o`rta maxsus ta`lim vaziri o`rinbosari U.Begimqulov ham ishtirok etdi.
Vazir o`rinbosari Vengriya rektorlari Kengashi Bosh kotibi Zoltan Dubesi bilan uchrashdi. O`tkazilgan muzokaralar natijasida Oliy va o`rta maxsus ta`lim vazirligi hamda Vengriya rektorlari Kengashi o`rtasida hamkorlik to`g`risida kelishuv imzolandi.
Vazir o`rinbosarining Vengriyaga safari davomida Etvosh Loran (Eötvös Loránd University) universiteti prorektori Imre Xamar va boshqa mas`ul rahbarlar ishtirokida uchrashuv bo`lib o`tdi.
O`tkazilgan muzokaralarda tomonlar Vengriyaning eng qadimiy va nufuzli universitetlaridan hisoblangan (1635 yilda tashkil etilgan) Etvosh Loran universitetida o`zbek tilini o`rganishni tashkil etish hamda Alisher Navoiy nomidagi Toshkent davlat o`zbek tili va adabiyoti universitetida qo`shma magistratura dasturini ochishga kelishildi.
Shuningdek, Vengriyaning Debresen universiteti bilan ham muzokaralar olib borilib, ushbu universitetning ta`lim dasturlarini yurtimizda amalga oshirish bo`yicha hamkorlik masalalari ko`rib chiqildi va bitim loyihasi muhokama qilindi.
