Avval xabar berganimizdek, O`zbekiston prezidenti 31 mart kuni Turkiy tilli davlatlar hamkorlik kengashining norasmiy sammitida ishtirok etib, bir qator muhim takliflarni ilgari surdi.
Xsusan, Alisher Navoiy nomidagi xalqaro mukofotni ta`sis qilish taklif etildi.
"Biz Bokuda o`tkazilgan sammitda adabiyot va san`at sohasida Xalqaro mukofotni ta`sis etish tashabbusini ilgari surgan edik.
Tashkilotimizga a`zo davlatlarning Siz, hurmatli rahbarlariga Turkiy Kengashning ilm-fan, ta`lim, madaniyat va san`at sohalarini, shuningdek, turkiy dunyo birligini rivojlantirishga ulkan hissa qo`shgan atoqli shaxslarni rag`batlantirish maqsadida xalqaro mukofot ta`sis etish haqidagi taklifni ma`qullaganingiz uchun tashakkur izhor etaman.
Ushbu mukofotni Mir Alisher Navoiy nomi bilan atash haqidagi taklifni qo`llab-quvvatlaganingiz uchun o`z nomimdan, O`zbekiston xalqi nomidan chuqur minnatdorlik bildiraman. Bunday hurmat-e`tibor va ishonch biz uchun katta sharafdir.
Biz buni barcha turkiy xalqlarning faxru iftixori bo`lgan, ulug` zot – Alisher Navoiyga yuksak ehtirom ifodasi, deb qabul qilamiz. Bu nufuzli mukofotning ta`sis etilishi turkiy birlik ruhini mustahkamlashga xizmat qilishi shubhasiz", - dedi o`z nutqida davlat rahbari.
