10 may kuni Innovasion rivojlanish vaziri Ibrohim Abdurahmonov hamda Germaniya xalqaro hamkorlik jamiyati (GIZ) direktori Yorg Pudelka 250 ming Evro qiymatidagi «Zamonaviy innovasion markazlar – 2022» texnik yordam loyihasini amalga oshirish to`g`risida Memorandum imzoladilar. Tadbirda O`zbekistonning Germanidagi Favqulodda va muxtor elchisi Nabijon Qosimov, Innovasion rivojlanish vazirining yuqori martabali maslahatchisi Karsten Hayns, shuningdek, O`zbekiston va Germaniyaning texnoparklari rahbarlari, oliy ta`lim muassasalari prorektorlari ishtirok etdilar.
Loyiha 3 ta asosiy komponentdan iborat bo`lib, u ilg`or Germaniya tajribasiga tayangan holda innovasion markazlar xodimlari va innovasion tizimning asosiy ishtirokchilarining stajirovkalarini tashkil etish, aholining innovasiyalar to`g`risida xabardorligini oshirishni o`z ichiga oladi.
Memorandum imzolanishi doirasida o`tkazilgan «Innovasiya markazlari – innovasiyalar katalizatori» mavzusidagi onlayn seminarda mazkur loyiha Germaniya iqtisodiy hamkorlik va rivojlanish Federal vazirligi tomonidan yuqori baholangani va qo`llab-qo`llab quvvatlangani ta`kidlandi. GIZ o`z faoliyati davomida ilk bora innovasiyalar sohasidagi loyihani amalga oshirayotgani e`tiborga molikdir. Tomonlar soha rivojlanishi va bu yo`nalishda malakali kadrlar tayyorlashning muhimligiga alohida diqqat qaratdilar va bu yo`nalishdagi hamkorlikni davom ettirishga kelishdilar.
– Bugungi kunda respublikamiz hududlarida innovasion infratuzilmalarni tashkil etarkanmiz, kadrlar masalasi, ularning malakasi katta ahamiyatga ega, – dedi Innovasion rivojlanish vaziri I. Abdurahmonov. – Innovasiyalar bo`yicha prorektorlar mas`ulligidagi ilmiy ishlanmalari tijoratlashtirish markazlariga umumiy konsepsiya ishlab chiqish o`ta muhim vazifadir. Vazirligimiz va GIZ o`rtasidagi o`zaro Anglashuv Memorandumi respublikamizda innovasion markazlarni rivojlantirish, boshqarish sohasini yangi va yuqori pog`onaga ko`tarishda katta turtki bo`lib xizmat qiladi.
Memorandum doirasida Xalqaro hamkorlik bo`yicha Germaniya jamiyatining (GIZ) beg`araz grantlari asosida 15 nafar o`zbekistonlik innovasiya sohasidagi mutaxassislar Germaniyaga malaka oshirishga yuboriladi, xalqaro ekspertlar yordamida «Innovasion markazlarni boshqarish to`g`risida»gi qo`llanma ishlab chiqiladi hamda Germaniyaning innovasiya sohasi to`g`risidagi lisenziyalangan hujjatli filmlar mamlakatimiz teleradiokanallari orqali keng jamoatchilikka taqdim etiladi.
Tadbirda Germaniya xalqaro hamkorlik jamiyati (GIZ) vakolatxonasi rahbari Y.Pudelka oxirgi yillarda Germaniya va O`zbekiston o`rtasidagi hamkorlik loyihalari tobora kengayib borayotganini alohida ta`kidlab, O`zbekiston Germaniya xalqaro hamkorlik jamiyatining Markaziy Osiyodagi muhim hamkorlaridan ekanini aytdi.
Ta`kidlash lozimki, mazkur loyiha O`zbekistonda alohida sohalarni va inson kapitali sifatini kuchaytirishda katta ahamiyat kasb etadi. Germaniya xalqaro hamkorlik jamiyati (GIZ) 1992 yildan boshlab O`zbekistonda Germaniya Federal Iqtisodiy hamkorlik va rivojlanish vazirligi va boshqa qator vazirlik va idoralar loyihalarini amalga oshiradi. Hozirgi kunda, GIZ O`zbekistonda iqtisodiyot, sog`liqni saqlash, ta`lim, tabiiy resurslar muhofazasi, shuningdek, ijtimoiy va madaniy integrasiyani rivojlantirish sohalaridagi islohotlarni qo`llab kelmoqda. Innovasion markazlarni rivojlantirish Germaniya va O`zbekiston o`rtasidagi yangi soha bo`lib, kelajakda hamkorlikning dolzarb yo`nalishlaridan biri bo`lishi kutilmoqda.
