Biroz avval Shavkat Mirziyoev Farg`ona viloyatidagi mavjud muammolarni sanab o`tgani haqida ma`lumot bergan edik. Shundan so`ng prezident viloyatdagi turli sohalarda qilinishi kutilayotgan ishlar yuzasidan ham to`xtalib o`tdi.
– Kelgusi besh yilda “Obod qishloq” va “Obod mahalla” dasturlari doirasida 150 ta qishloq va 40 ta mahallani obodonlashtirish choralari ko`riladi. Bunga 1 trillion 860 milliard so`m mablag` ajratiladi.
– Yozyovon, So`x, Qo`shtepa va Furqat tumanlarining sharoiti og`ir 57 ta mahallasida qishloq infratuzilmasini rivojlantirishga 32 million dollar mablag` ajratiladi.
– Kelgusi yildan har bir tuman va shahar byudjetining kamida 5 foizi aholi murojaatlariga muvofiq, eng dolzarb muammolarni hal qilishga yo`naltiriladi.
Uy-joy masalasi
– Kelgusi besh yilda jami 30 ming kvartirali 700 ta ko`p qavatli uylar quriladi. Bu – oldingi yillarga nisbatan 3 barobar ko`p, degani. Bunda 2,5 mingta uy-joy og`ir ijtimoiy vaziyatga tushib qolgan yolg`iz ayollar, ehtiyojmand oilalar va nogironligi bo`lgan fuqarolarga beriladi. Shuningdek, kelgusi besh yilda 14 mingdan ziyod oilaga ipoteka krediti bo`yicha 680 milliard so`mlik subsidiya ajratiladi.
Shu bilan birga, viloyat hududlaridagi eskirgan 200 ta 2-3 qavatli uylar o`rnida, renovasiya dasturlari asosida 7-12 qavatli uy-joylar quriladi. Bag`dod tumani “Guliston” mahallasida barpo qilingan shaharcha namunasi asosida, Yozyovon,Oltiariq va Farg`ona tumanlarida ham kamida 4-5 ming xonadonli “yo`ldosh” shaharchalar bunyod etiladi.
Suv, oqava, elektr ta`minoti
– Kelgusi besh yilda Farg`ona viloyatida ichimlik suvi bilan ta`minlash darajasi 69 foizdan 90 foizga etkaziladi.
– Elektr ta`minotini yaxshilash maqsadida 7 ming kilometr elektr tarmoqlari va 2 mingta transformator yangilanadi. Bunga 1 trillion so`mdan ziyod mablag`lar yo`naltiriladi.
– Elektr, suv, kanalizasiya, issiqlik ta`minoti va yo`l infratuzilmalarini yaxshilashga jami 10 trillion so`m yo`naltiriladi.
Tibbiyot tizimi
– Bu uchun faqatgina davlat byudjetidan kelgusi besh yilda 5 trillion so`m ajratiladi.
– 22 ta yangi oilaviy shifokorlik punkti va 10 ta oilaviy poliklinika barpo etiladi va zamonaviy tibbiy jihozlar bilan ta`minlanadi.
– birlamchi bo`g`inga qo`shimcha 1,5 mingta shtat ajratiladi.
– birlamchi tibbiy xizmatda dori vositalari va tibbiy buyumlar xarid qilish uchun ajratiladigan mablag`lar 3 barobarga oshiriladi. Buning uchun byudjetdan har yili kamida 50 milliard so`mdan ajratiladi.
– viloyatning 40 yoshdan oshgan 1 millionga yaqin aholisi o`rtasida yurak-qon tomir va diabet kasalliklari bo`yicha manzilli skrining tekshiruvlari o`tkaziladi.
– Bag`dod, Yozyovon tumanlari va Qo`qon shahrida tumanlararo shikastlanishlar va o`tkir qon-tomir kasalliklari markazlari tashkil etiladi.
– Farg`ona shahrida – 2 ta, Qo`qon, Marg`ilon shaharlari hamda Beshariq tumanida – 1 tadan tumanlararo perinatal markazlar tashkil etiladi.
– Quva, Buvayda, Oltiariq, Farg`ona, O`zbekiston, Qo`shtepa, Rishton va Toshloq tumanlari tibbiyot birlashmalari laparoskopik uskunalar bilan ta`minlanib, kaminvaziv operasiyalar o`tkazish yo`lga qo`yiladi.
– 120 o`rin joyga ega bo`lgan Bolalar tibbiy reabilitasiya markazi tashkil etiladi.
– viloyatning har bir shahar va tuman poliklinikalarida bolalar bo`limlari faoliyati qayta tiklanadi, shifoxonalarda esa bolalar reanimasiyasi tashkil etiladi.
– Farg`onada, vodiyda yagona Bolalar kardio-xirurgiya markazi tashkil etilib, tug`ma yurak nuqsoni bor, yuqori texnologik operasiyaga muhtoj bolalarni zamonaviy endovaskulyar yo`l bilan xirurgik davolash yo`lga qo`yiladi. Bu borada barcha davolash amaliyotlari byudjet hisobidan amalga oshiriladi.
– viloyatda mingdan ziyod bemorlar buyrak etishmovchiligi bo`yicha nazoratda turganini inobatga olib, Nefrologiya markazining filiali tashkil etiladi va buyrak transplantasiyasi yo`lga qo`yiladi. Shuningdek, gemodializ uskunalari 2-3 barobarga ko`paytiriladi.
– viloyatda Hindiston bilan hamkorlikda Endokrinologiya markazi tashkil etiladi.
– Davlat-xususiy sheriklik asosida, viloyat ko`ptarmoqli tibbiyot markazi negizida barcha xirurgik xizmatlarni bir joyni o`zida tashkil etuvchi zamonaviy tibbiyot klasteri barpo etiladi.
Sardorbek Rahmonqulov, yig`ilishdan maxsus
