Sevimli

O`zbekiston Davlat san`at muzeyining yangi binosi qurilishiga dunyoga mashhur arxitektor jalb qilindi

Jamiyat 18.01.2022, 16:01
O`zbekiston Davlat san`at muzeyining yangi binosi qurilishiga dunyoga mashhur arxitektor jalb qilindi

O`zbekiston Davlat san`at muzeyining yangi binosi uchun muhandislik va rejalashtirish echimlariga bag`ishlangan taqdimoti bo`lib o`tdi. Bu haqda Turizm va sport vazirligi Axborot xizmati xabar qilmoqda.

Ma`lum qilinishicha, muzeyning arxitektura loyihasi butun dunyoga mashhur arxitektor, Pritkserov mukofoti sovrindori Tadao Andoning "Tadao Ando Architect & Associates" me`morchilik byurosi ishtirokida amalga oshirilmoqda.

Tadbirda O`zbekiston Respublikasi Bosh vazir o`rinbosari, Turizm va sport vaziri Aziz Abduhakimov, Madaniyat va san`atni rivojlantirish jamg`armasi ijrochi direktori Gayane Umerova, qurilish vaziri o`rinbosari Nasrullo Boboev, “Atelier Brückner” byurosi vakillari, byuroning boshqaruv hamkori Eberxart Shlag, shuningdek Vazirlar Mahkamasi huzuridagi "Tashkent city" qurilish direksiyasi vakillari qatnashishdi.  

Davlat rahbari topshirig`iga muvofiq, O`zbekiston Respublikasi Vazirlar Mahkamasi huzuridagi Madaniyat va san`atni rivojlantirish jamg`armasi taniqli o`zbekistonlik investor va xayriyachi Alisher Usmonov asos solgan «San`at, fan va sport» xayriya jamg`armasi bilan hamkorlikda O`zbekiston Davlat san`at muzeyi yangi binosining qurilishi loyihasini amalga oshirmoqda.  

Muzey binosining me`moriy loyihasi jahonga mashhur me`mor, «Pritzker» mukofoti sovrindori Tadao Andoning  «Tadao Ando Architect & Associates» me`moriy byurosi ishtirokida ishlab chiqiladi. Bosh loyihachi sifatida esa, «Atelier Brückner GmbH» (Germaniya) me`moriy byurosi ish olib boradi.

O`zbekiston Davlat san`at muzeyi yangi binosining qurilishi 2022-2023 yillarda Toshkent shahrida, “Abulqosim madrasasi”, “Istiqlol” san`at saroyi va Alisher Navoiy haykali oralig`ida olib boriladi.  

Tadbirda ma`lum qilinishicha, muzeyning dizayn konsepsiyasi katta ekspozisiya maydoni, muzey kolleksiyalarini saqlash xonasi, kutubxona, ma`ruza xonasi, kafe hamda tom qismida terrasa va parkni o`z ichiga olgan.  

Taqdimot davomida ob`ektning bosh rejasi, ekspozisiya maydoni,  jamoatchilik uchun ajratilgan hudud, muzey kolleksiyalari xonasi, anjumanlar zali, restoran, kafe va auditoriyalar hamda kutubxonaning muhandislik va rejalashtirish qarorlari havola etildi. Muzeyni loyihalashtirish ishlari muzey maydoni faoliyatiga doir barcha eng yangi texnologiyalarini inobatga olgan holda olib borilmoqda.  

Bundan avval Tadao Ando shunday degan edi: “O`zbekiston Davlat san`at muzeyi tiklanish va umid ramzi sifatida namoyon bo`lishi kerak, deb hisoblayman. Men uni vaqt ummonida harakatlanayotgan kema kabi ko`raman. Mening me`morchilik ishlarim insonlarni o`z salohiyatlarini namoyon qilishga va kelajak sari harakat qilishga ilhom bag`ishlashini juda xohlardim”.

Ta`kidlash joizki, Davlat san`at muzeyi yangi binosining to`liq taqdimoti 2022 yilning aprel oyida namoyish etiladi.

Шарҳлар