Narpay va Paxtachi tumanlarida elektr energiyasidan noqonuniy foydalanish holatlari aniqlandi. Bu haqda Bosh prokuratura huzuridagi Departament xabar qildi.
Departamentning Narpay tumani bo`limi tomonidan o`tkazilgan tergovga qadar tekshiruvda, “A.O.” oilaviy korxonasi rahbari S.I. payvandlash va boshqa uskunalarni to`g`ridan-to`g`ri elektr tarmog`iga ulab, elektr energiyasidan noqonuniy foydalanib kelganligi natijasida davlat va jamiyat manfaatlariga 830,3 mln so`m zarar etkazilganligi aniqlangan.
Xuddi shunday, Paxtachi tuman bo`limi tomonidan o`tkazilgan tergovga qadar tekshiruvda, fuqaro I.B. o`z xonadonida toshni kesish, ishlov berish va pardozlash xizmatini ko`rsatish uchun “F.B.” oilaviy korxonasini tashkil etib, tegirmon va boshqa uskunalarni o`rnatib, elektr ta`minoti korxonasi ruxsatisiz, o`zboshimchalik bilan elektr tarmog`iga ulanib foydalanganligi natijasida davlat va jamiyat manfaatlariga 133,8 mln so`m zarar etkazilganligi aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo`zg`atilib, tergov harakatlari o`tkazilmoqda.
