Poytaxtimizning Olmazor tumanida joylashgan "G`alaba bog`i" majmuasida "Men g`olib" shiori ostida yugurish marafoni bo`lib o`tdi. Unda Mudofaa, Ichki ishlar, Favqulodda vaziyatlar vazirliklari, Davlat xavfsizlik xizmati, Davlat bojxona qo`mitasi, Prezident Davlat xavfsizlik xizmati, Milliy gvardiya harbiy xizmatchilari, Qurolli kuchlar faxriylari hamda turli vazirliklar va tashkilotlardan kelgan mehmonlar va sport ishqibozlari ishtirok etishdi. Marafon qatnashchilari Qoraqamish, Kichik halqa yo`li, Sag`bon, Oltinsoy, Dilsaroy ko`chalari orqali "G`alaba bog`i"dagi finishga etib kelishdi.
Harbiy xizmatchilar o`rtasidagi marafonda 1-o`ringa Mudofaa vazirligi sharafini himoya qilgan Markaziy harbiy okrugi harbiy xizmatchisi, leytenant Nuriddin Rahmatov sazovor bo`ldi. 2-o`rin esa Davlat xavfsizlik xizmati vakiliga nasib etgan bo`lsa, 3-o`rinni ham Mudofaa vazirligi jamoasi vakili qo`lga kiritdi.
Bundan tashqari marafonda oliy harbiy ta`lim muassasalari kursantlari orasidan ham g`oliblar aniqlandi. Unga ko`ra 1-o`rin Qurolli kuchlar akademiyasi sharafini himoya qilgan kursantlarga, 2-o`rin O`zbekiston Respublikasi Jamoat xavfsizligi universitetiga, 3-o`rin Ichki ishlar akademiyasiga nasib etdi.
Umumjamoa hisobida 3-o`rinni Prezident Davlat xavfsizlik xizmati jamoasi egalladi. 2-o`rinni Davlat xavfsizlik xizmati vakillari qo`lga kiritishgan bo`lsa, marafonning mutlaq g`olibi sifatida Mudofaa vazirligi jamoasi e`tirof etildi.
Marafon so`ngida g`olib va sovrindorlar medal, kubok hamda estalik sovg`alari bilan taqdirlanishdi.
