Sog`liqni saqlash vazirligi, Sanitariya-epidemiologik osoyishtalik va jamoat salomatligi xizmati hamda YuNISEFning O`zbekistondagi vakolatxonasi bilan hamkorlikda O`zbekistonda immunizasiya va vaksinasiya jarayonlari, Milliy profilaktik emlash taqvimi va bu borada aholiga ishonchli ma`lumotlarni etkazish yuzasidan soha ekspertlari ishtirokida matbuot konferensiyasi boshlandi.
Unda ishtirok etayotgan darakchi.uz muharriri Farida Egamberdievaga ko`ra, shu kunlarda dunyoning qator davlatlarida tarqalayotgan maymun chechagi infeksiyasi xususida kelib tushgan savolga Sanitariya-epidemiologik osoyishtalik va jamoat salomatligi xizmati boshlig`i o`rinbosari, tibbiyot fanlari doktori, professor.Nurmat Atabekov quyidagicha javob berdi:
— Jahon sog`liqni saqlash tashkilotining ma`ulomotlariga ko`ra, kasallik hozirgacha 14 ta davlatda qayd etilgan, — dedi N.Atabekov. —Xususan, infeksiyani yuqtirganlar soni 90 nafarga yaqinlashgani aytilyapti. Qolaversa, qariyb 30 kishi kasallikka chalinganlikda gumonlanmoqda. Qolaversa, shu kungacha o`lim holatlari ro`yxatga olinmadi.
Aslida, bu xastalik kecha yoki bugun paydo bo`lgani yo`q. Ya`ni ilk bor u bundan 52 yil avval Kongo Demokratik Respublikasida aniqlangan. Kasallikning alohida holatlari Markaziy va G`arbiy Afrika mamlakatlarida kuzatilgan.
Bizdagi ma`lumotlarga ko`ra, maymun chechagi deyarli barcha holatlarda hayvonlardan odamga yuqadi. Asosan endemik hududlarga safar qilgan va jonivorlar bilan muloqotda bo`lgan kishilarda tasdiqlanishi mumkin.
Dunyo bo`ylab kasallikning qayta avj olishi 7 may sanasidan boshlandi. Shu kuni Buyuk Britaniyaga Nigeriyadan qaytgan sayyohda mazkur infeksiya aniqlandi. Unda kasallik belgilari terida toshmalar toshishi bilan namoyon bo`lgan. Shundan so`ng ushbu mamlakatda o`nga yaqin bemorlar maymun chechagiga chalingani ma`lum bo`ldi.
Keyinroq AQSh, Kanada, Ispaniya, Portugaliya, Fransiya, Italiya, Shvesiya, Belgiya, Niderlandiya, Gresiya, Avstraliya, Isroil va Shveysariyada ham xastalik tarqala boshlagani haqida xabar topdik.
Tahlillarga ko`ra, kasallik odatda engil kechyapti va bemorlarning ko`pchiligi bir necha hafta ichida tuzalib ketmoqda.
Shunga qaramay, hozir JSST maymun infeksiyasi keng tarqalib ketmasligi uchun dunyo mamlakatlarini profilaktik choralarni kuchaytirishga chaqirmoqda.
Mutaxassislar fikricha, aynan maymun chechagiga qarshi emlash preparatlari mavjud bo`lmasa-da, bir qator mamlakatlar oddiy chechakka qarshi vaksinalar orqali buning oldini olishga harakat qilmoqda.
Chunki ikki virus bir-biriga o`xshash va shu tufayli bunday vaksinalar maymun chechagining oldini olishda taxminan 85 foizga samara berishi kutilyapti.
O`zbkistonda hozirga qadar maymun chechagi qayd etilgani yo`q. Ayni paytda JSST tavsiyalaridan kelib chiqib bu infeksiyaning yurtimizga kirib kelmasligi uchun zarur choralarni ko`ryapmiz.
