Bosh prokuraturada Bosh prokuror Nig`matilla Yo`ldoshevning Turkiya respublikasi oliy kassasiyasi bosh prokurori Bekir Shaxin bilan uchrashuvi bo`lib o`tdi. Bu haqda Bosh prokuratura matbuot xizmati xabar berdi.
Uchrashuv davomida Turkiya delegasiyasi vakillariga Prezident Sh.M.Mirziyoev boshchiligida davlat va jamiyat hayotining barcha jabhalarida, xususan, sud-huquq sohasida amalga oshirilayotgan keng ko`lamli islohotlar, shuningdek O`zbekiston prokuratura organlarining faoliyat yo`nalishlari haqida ma`lumot berildi.
Muloqotda tomonlar o`zaro manfaatli bo`lgan keng qamrovli masalalarni muhokama qildilar va idoralararo hamkorlikni yanada rivojlantirish istiqbollari bo`yicha fikr almashdilar.
Uchrashuvning asosiy voqeasi Bosh prokuratura va Turkiya Oliy kassasiya sudi Bosh prokuraturasi o`rtasida Anglashuv memorandumi imzolangani bo`ldi.
Ushbu hujjat prokuratura organlari faoliyat yo`nalishlari yuzasidan ilg`or tajriba almashish orqali ikki tomonlama sheriklikni yangi bosqichga ko`tarishga xizmat qilishi ta`kidlandi.
Uchrashuv yakunida Bekir Shaxin idoralararo hamkorlik aloqalarini rivojlantirishga qo`shgan hissasi uchun “O`zbekiston Respublikasi prokuraturasining faxriy xodimi” ko`krak nishoni bilan taqdirlandi.
So`ngra, Turkiya delegasiyasi a`zolari uchun Bosh prokuratura muzeyiga ekskursiya tashkil qilindi.
Delegasiya a`zolari muzeyning sud-huquq sohasining qadimgi va o`rta asr davridagi ma`lumotlaridan boshlab, Turkiston ASSR, ikkinchi jahon urushi va urushdan keyingi yillar, mustaqillik ostonasi hamda xozirga davr tarixi bilan tanishib, o`zlarida yorqin taassurotlar uyg`otishdi.
Keyingi manzil Bosh prokuratura Akademiyasi bo`lib, delegasiya a`zolari Akademiyaning faoliyati bilan yaqindan tanishtirildi. Turkiya delegasiyasi a`zolari istiqlolimizning o`ttiz yilligiga bag`ishlab bunyod etilgan va atrofga ko`rk berib turgan “Yangi O`zbekiston” bog`iga tashrif buyurishdi.
O`zbekiston Respublikasi Adliya vaziri Ruslanbek Davletov Turkiya Respublikasi Oliy kassasiya sudi Bosh prokurori Bekir Shaxin bilan uchrashdi. Uchrashuv davomida Adliya vaziri mehmonlarni vazirlik faoliyati, uning vazifalari, O`zbekistonda adliya va huquq sohalarida amalga oshirilayotgan keng ko`lamli islohotlar bilan tanishtirilib, kelgusida ikki davlat o`rtasida tajriba almashish bo`yicha hamkorlikni yanada rivojlantirish yuzasidan kelishib olindi.
Shundan so`ng, O`zbekiston Respublikasi Oliy sudi raisi Kozimjon Komilov Turkiya Respublikasi Oliy kassasiya sudi Bosh prokurori Bekir Shaxin bilan uchrashdi. Samimiy muloqot ruhida o`tgan uchrashuvda tomonlar davlatlarimiz sud hokimiyatlari o`rtasida konstruktiv va o`zaro manfaatlarga asoslangan hamkorlikni yanada kengaytirish tarafdori ekanligini ta`kidlashdi.
