25 may kuni O`zbekiston Respublikasi Prezidenti huzurida maktab ta`limidagi islohotlarning borishi muhokama qilindi. Bu haqda Prezident Matbuot xizmati xabar berdi.
Ma`lumki, yaqinda, davlatimiz rahbarining 11 maydagi farmoni bilan 2022-2026 yillarda xalq ta`limini rivojlantirish bo`yicha milliy dastur tasdiqlandi. Unda ilg`or xorijiy tajriba asosida ta`lim sifatini oshirish, o`qituvchilik kasbining nufuzini yuksaltirish, inklyuziv ta`limni rivojlantirish, o`quvchilarni kasbga yo`naltirish, infratuzilmani yaxshilash, sohani raqamlashtirish bo`yicha dolzarb yo`nalishlar belgilangan. Bu yo`nalishlarning har biri o`nlab aniq vazifalardan iborat. Ular har bir tuman va shahar kesimida ishlab chiqilgan “yo`l xaritalari” asosida amalga oshirilmoqda.
Yig`ilishda xalq ta`limi vaziri shu boradagi ishlar va kelgusi o`quv yiliga mo`ljallangan rejalar to`g`risida hisobot berdi.
Avvalo, yangi milliy dasturni ta`lim jarayoniga joriy etish masalalari ko`rib chiqildi. Xususan, bu yil 3, 6, 7 va 10-sinflar uchun, 2023-2024 yillarda 4, 5, 8, 9 va 11-sinflar uchun darsliklar, mashq daftarlari hamda o`quv qo`llanmalari yaratilishi belgilangan.
Davlatimiz rahbari buning uchun xorijiy ekspertlar va tadqiqotchilardan iborat ishchi guruhini shakllantirib, darsliklarni sifatli tayyorlash zarurligini ta`kidladi.
Milliy dasturda o`qituvchilarning jamiyatdagi nufuzini oshirish masalasiga alohida e`tibor qaratilgan. Bu yuksak bilim va mahoratli, zamonaviy kadrlar tayyorlashni taqozo etadi. Shu maqsadda Nizomiy nomidagi Toshkent davlat pedagogika universiteti hamda uning huzuridagi ta`lim va ilmiy tashkilotlar Xalq ta`limi vazirligi tasarrufiga o`tkazildi.
Yig`ilishda pedagogik ta`limni transformasiya qilish, universitetga qabulni takomillashtirish, ilmiy salohiyatni oshirish va o`qishni amaliyot bilan bog`lash bo`yicha ko`rsatmalar berildi.
O`qituvchilarning kasbiy mahoratini oshirish va ularni yangi metodikaga o`rgatish haqida so`z borar ekan, Abdulla Avloniy nomidagi milliy tadqiqot instituti faoliyatini kengaytirib, uni hududlardagi pedagogika o`quv yurtlari bilan uzviy bog`lash zarurligi ta`kidlandi. Kelgusi o`quv yilidan boshlab kimyo, biologiya, fizika va matematika o`qituvchilari uchun kasbiy sertifikatlash tizimi yo`lga qo`yilishi belgilandi.
Prezidentimiz maktab direktorlarini to`g`ri tanlash, ularning kasbiy va boshqaruv mahoratini rivojlantirish masalasiga alohida to`xtaldi. Ta`lim bilan birga tarbiya ham muhimligini ta`kidladi.
– Ma`naviyat maktabdan boshlanadi. Maktablarda ta`lim sifatiga qanday e`tibor bersak, ma`naviyatga ham shunday e`tibor berishimiz kerak, – dedi Shavkat Mirziyoev.
Shu maqsadda o`quvchilarning dunyoqarashi va iqtidorini oshiradigan, turli yoshdagi sinflar uchun mo`ljallangan ma`naviyat kitoblari yaratish bo`yicha tavsiya berildi.
Maktabdan tashqari ta`limni rivojlantirish masalasiga ham to`xtalib o`tildi. “Barkamol avlod” maktablari faoliyati va infratuzilmasini yaxshilash bo`yicha besh yillik dastur ishlab chiqish, ularda “STEAM” yo`nalishlari bo`yicha to`garaklar tashkil etish vazifasi qo`yildi.
