Prezident Shavkat Mirziyoev bugun, 27 iyun kuni Toshkent shahrida amalga oshirilayotgan investisiya loyihalari taqdimoti bilan tanishdi.
Bu haqda davlat rahbari matbuot xizmati xabar bermoqda.
Xabardor qilinishicha, bu yil poytaxtda qariyb 4 milliard dollar investisiya hisobiga 500 dan ziyod loyiha rejalashtirilgan. Bugungi kunga kelib, shundan 1 milliard 500 million dollari o`zlashtirilgan. 120 million dollarlik 71 ta loyiha ishga tushirilib, 5 mingdan ortiq ish o`rni yaratilgan. Umumiy miqdori 2 milliard 300 million dollarlik yana 450 ta loyiha bo`yicha ish olib borilayotgani ta`kidlanmoqda.
Davlatimiz rahbari birinchi yarim yillikdagi ko`rsatkichlar etarli emasligini qayd etib, kechikayotgan loyihalarning muammosini hal qilish, investisiyalar jalb etishni ko`paytirish bo`yicha ko`rsatmalar bergani aytilmoqda.
Shuningdek, taqdimotda “Yangihayot” industrial texnoparkida olib borilayotgan ishlar ham ko`rib chiqilgani ma`lum qilindi.
Ta`kidlanganidek, bu haqda O`zbekiston Prezidentining 2021 yil 4 fevraldagi qarorida belgilangan edi.
Ma`lumotga ko`ra, ushbu texnopark uchun 210 gektar maydon ajratilgan. Bosh reja ishlab chiqilib, bugungi kunda muhandislik-kommunikasiya tarmoqlarini barpo etish boshlangan.
Mirziyoev bu ham iqtisodiy, ham ijtimoiy jihatdan muhim loyiha ekanini ta`kidlaydi.
"Hech qaysi davlatda tadbirkorga engillik yaratmasdan turib, natijaga erishib bo`lmaydi. Bu texnopark tadbirkorlar uchun qulay maydon bo`lishi kerak. Import o`rnini bosadigan, ko`proq odamlarni ish bilan ta`minlaydigan loyihalarga e`tibor qaratish kerak", – deydi O`zbekiston etakchisi.
Eslatma uchun, birinchi bosqichda texnoparkning 110 gektar maydoni auksionda sotilgan. Ularda oshxona jihozlari, qandolatchilik va to`qimachilik mahsulotlari, santexnika tovarlari, polietilen va metall buyumlar ishlab chiqarish loyihalari joylashtirilgan. Umuman, texnoparkda tashkil etiladigan korxonalarda 20 ming ish o`rni yaratilishi mo`ljallangan.
