Bugun, 4 iyul kuni O`zbekiston Respublikasi Prezidenti Shavkat Mirziyoev o`zining iqtisodiy taraqqiyot, samarali boshqaruv va xalqaro hamkorlik masalalari bo`yicha maslahatchisi Suma Chakrabartini qabul qildi.
Uchrashuvda 2022 — 2026 yillarga mo`ljallangan Yangi O`zbekistonning Taraqqiyot strategiyasi doirasida mamlakatimizdagi iqtisodiy islohotlarni davom ettirish va natijadorligini oshirish masalalari muhokama qilindi, deya xabar bermoqda davlat rahbari matbuot kotibi.
Ta`kidlanishicha, Suma Chakrabarti bundan buyon ham yangi o`sish nuqtalarini topish va ro`yobga chiqarishda O`zbekiston hukumatiga ko`maklashishga bor sa`y-harakatini yo`naltirishga tayyorligini bildirgan.
"Mamlakatimizda amalga oshirilayotgan yangilanishlarni sifat jihatidan yangi darajaga olib chiqishga O`zbekistonda boshlangan hamda demokratik prinsiplar va huquqiy normalarga to`la mos holda, konstitusiyaviy qurilishning ilg`or milliy va xalqaro tajribasi asosida amalga oshirilayotgan Konstitusiya islohoti xizmat qilishi ta`kidlandi",-deyiladi xabarda.
Eslatib o`tamiz, Suma Chakrabarti O`zbekiston Prezidentining maslahatchisi etib tayinlanishidan avval sakkiz yil davomida Evropa tiklanish va taraqqiyot banki prezidenti lavozimida faoliyat yuritgan.
Dilbar Abdunabieva.
