Bugun, 29 iyul kuni Shavkat Mirziyoev Toshkentdagi ShHT Tashqi ishlar vazirlari kengashi yig`ilishining tadbirlarida ishtirok etayotgan ShHTga a`zo davlatlar delegasiyalarining rahbarlarini qabul qildi.
Tadbirda O`zbekistonning birlashmaga raisligi davomida o`tgan davrda birgalikda amalga oshirilgan ishlar natijalari hamda joriy yil sentyabr oyida Samarqandda o`tadigan sammit kun tartibiga alohida e`tibor qaratilgan..
Xalqaro va mintaqaviy ahamiyatga molik dolzarb masalalar yuzasidan ham fikr almashilgan.
Davlat rahbari matbuot xizmatining xabar berishicha, uchrashuvda Hindiston Respublikasi tashqi ishlar vaziri Subramanyam Jayshankar, Qozog`iston Respublikasi Bosh vazirining o`rinbosari - tashqi ishlar vaziri Muxtor Tleuberdi, Xitoy Xalq Respublikasi Davlat kengashi a`zosi, tashqi ishlar vaziri Van I, Qirg`iz Respublikasi tashqi ishlar vaziri Jeenbek Kulubaev, Pokiston Islom Respublikasi tashqi ishlar vaziri Bilaval Bxutto Zardariy, Rossiya Federasiyasi tashqi ishlar vaziri Sergey Lavrov, Tojikiston Respublikasi tashqi ishlar vaziri Sirojiddin Muhriddin, shuningdek, Tashkilot bosh kotibi Chjan Min va ShHT Mintaqaviy aksilterror tuzilmasi Ijroiya qo`mitasi direktori Ruslan Mirzaev ishtirok etdi.
Ma`lum qilinishicha, O`zbekiston etakchisi an`anaviy kooperasiya va logistika zanjirlari buzilmoqda.
Shuningdek, jahon mamlakatlarining aksariyatida oziq-ovqat va energetika xavfsizligi sohasidagi vaziyat keskinlashib, inflyasiya ko`rsatkichlari shiddat bilan o`sayotgan murakkab sharoitda xatarlarga mos ravishda chora ko`rish uchun sa`y-harakatlarni samarali muvofiqlashtirish va ko`p tomonlama asosda yaqindan hamkorlik qilishga ehtiyoj kuchayib bormoqda.
O`zbekiston etakchisi shu bois ShHTni yanada rivojlantirishning qator prinsipial jihatlarini belgilab berdi.
Bular – Tashkilotning hech qanday bloklarga qo`shilmaslik maqomini saqlash, yangi xatar va tahdidlarga qarshi kurashish bo`yicha salohiyatini kuchaytirish, Markaziy Osiyoning ShHTning “geografik o`zagi” sifatidagi o`rnini saqlab qolish, transmintaqaviy o`zaro bog`liqlik loyihalarini ilgari surish hamda Afg`onistonni mintaqadagi iqtisodiy jarayonlarga yanada faol jalb qilish.
Eslatib o`tamiz, uchrashuv yakunida ShHT makonida xalqlar va mamlakatlar manfaatlari yo`lida do`stlik va yaxshi qo`shnichilik munosabatlarini, keng ko`lamli hamkorlikni yanada mustahkamlashga O`zbekistonning intilishi qat`iy ekani qayd etilgan.
