Sevimli

“O`zbekneftgaz”: Turkiyada o`tayotgan V Islom birdamligi o`yinlarida engil atletikachilarimiz uzunlikka sakrash, nayza uloqtirish va yugurish bahslarida sovrinli o`rinlarni egallashdi

Sport 11.08.2022, 10:15
“O`zbekneftgaz”: Turkiyada o`tayotgan V Islom birdamligi o`yinlarida engil atletikachilarimiz uzunlikka sakrash, nayza uloqtirish va yugurish bahslarida sovrinli o`rinlarni egallashdi

Turkiyaning Konya shahrida bo`lib o`tayotgan V Islom birdamligi o`yinlarida 56 mamlakatidan tashrif buyurgan atletlar qatorida o`zbekistonlik engil atletikachilar ham sovrinli o`rinlar uchun bellashishmoqda.

“O`zbekneftgaz” AJ Boshqaruv raisi, O`zbekiston engil atletika federasiyasi rahbari Mehriddin Abdullaev ushbu musoboqada ishtirok etayotgan atletlarimizning holati va kutilayotgan natijalar, ularning kayfiyati hamda muvaffaqiyatli ishtirok etishlari borasida terma jamoa murabbiylari bilan suhbatlashib, sportchilarimizning g`alabasi ularning izdoshlari uchun motivasiya bo`lishi, shu sabab imkon qadar sovrinli o`rinlarni egallash lozimligini ta`kidlab o`tdi.

Sportchilar esa musoboqaning dastlabki kunlaridagi ishtiroklarining o`zidayoq, ijobiy natijalar qayd etib sport ishqibozlariga xursandchilik ulashishmoqda.

Jumladan, uzunlikka sakrash bo`yicha bahslarda ishtirok etgan sportchimiz Roksana Xudoyorova 6.32 metrlik natija bilan bronza medalga egalik qildi.Ushbu dasturda qatnashgan yana bir engil atletikachimiz Darya Reznichenko ham 6.28 metr natija bilan kuchli beshlikdan joy egalladi.

Engil atletikachilarning yana bir g`alabasi esa Nargiza Qo`chqorava tomonidan qo`lga kiritildi. U nayza uloqtirish musoboqasida yurtimiz sharafini munosib himoya qilib 56.08 metr natijani qayd etdi va bronza medalga sazovor bo`ldi.

Islom birdamlik o`yinlaridagi ushbu yo`nalishda bahslarda ishtirok etgan vakilamiz Musharrafxon Saidahmedova 56.06 metr natija bilan to`rtinchi o`rinni band etdi.

Konya-2021o`yinlarida engil atletikachilar safida 400 metr masofaga yugurish dasturida qatnashgan Farida Solieva o`ziga bildirilgan ishonchni oqladi.

Farida Solieva 54.07 natija bilan marra chizig`ini ikkinchi bo`lib kesib o`tdi va 21 yoshli sportchimiz musoboqaning kumush medalini qo`lga kiritdi hamda o`z faoliyati eng yaxshi ko`rsatkichini yangilashga muvaffaq bo`ldi.

Eslatib o`tamiz, Konya-2021 V Islom birdamligi o`yinlari 18 avgustga qadar davom etadi.

Sharhlar