Ijtimoiy tarmoqlarda Toshkentda ayol eri bilan yurgan qizni samosud qilgani aks etgan video tarqaldi. Aytilishicha, samosud qilingan qiz Pedagogika universitetining talabasi bo`lgan.
Ma`lum qilinishicha, ushbu voqea yuzasidan Toshkent davlat pedagogika universiteti tomonidan o`rganish olib borilgan.
Aniqlanishicha, universitet talabasi Yu.R. doimiy yashash joyi Samarqand viloyati Kattaqo`rg`on tumanidan J. ismli yigitning avtomoshinasida ota-onasi tomonidan yuborilgan pochta (oziq ovqat mahsulotlari) ni ikki marta qabul qilib olgan.
Talaba qizga ota-onasidan yuborilgan pochtani J.ismli shaxs universitetga olib kelganida uning ayoli (videodagi ayol) ham yonida bo`lgan.
Bir necha kundan keyin sodir bo`lgan videodagi janjalli holat talaba Yu.R. uchun ham tushunarsiz bo`lib, ushbu voqea yuzasidan talaba Ichki ishlar idoralariga ariza bilan murojaat qilgan.
"Shu o`rinda axborot tarqatuvchilar va ijtimoiy tarmoq foydalanuvchilaridan xaqqoniy va xolis axborot tarqatishingizni, ayniqsa bilib bilmay qiz bola sha`niga turli tuhmatlar qilmasligingizni so`rab qolamiz.
Ushbu masala yuzasidan Ichki ishlar organi mas`ullari tomonidan tergov ishlari olib borilayotgan ma`lum qilamiz" , – deyiladi universitet munosabatida.
