Rossiya bosh diplomati Sergey Lavrov Ukrainani “nasistlarning totalitar davlati” deb atadi. Rossiya Federasiyasi Tashqi ishlar vazirligi rahbari 22 sentyabr, payshanba kuni Birlashgan Millatlar Tashkiloti Xavfsizlik Kengashi yig`ilishida so`zlagan nutqida shunday bayonot berdi.
Lavrovning aytishicha, u "Kiev rejimi" deb atagan hozirgi Ukraina hukumati go`yoki rus tilini buzadi va rus tilida so`zlashuvchi ukrainaliklarning huquqlarini cheklaydi. Shuningdek, rossiyalik bosh diplomatning aytishicha, Ukrainada rus tilida nashr etilgan kitoblar yo`q qilinmoqda.
Rossiya TIV rahbarining so`zlariga ko`ra, hozir Ukrainadagi vaziyat Adolf Gitler boshchiligidagi nasistlar hokimiyat tepasiga kelgan Germaniyadagi vaziyatga o`xshaydi.
Lavrov shuningdek, zamonaviy Ukraina va fashistlar Germaniyasi o`rtasida tenglik belgisi ham qo`yilishi kerak, deb hisoblaydi, chunki 2014 yildan beri ko`plab ukrainaliklar millatchi batalonlarda xizmat qilmoqda. Ammo siyosatchi bu atama bilan Ukrainadagi qaysi taktik birliklarni nazarda tutganini aniqlamadi.
Shuningdek, Lavrov BMT majlislar zalida Qadr-qimmat inqilobini "to`ntarish" deb atadi va 2014 yilda Ukrainada Viktor Yanukovich hukumati ag`darilgani tufayli hozir “Donbass aholisi o`ldirilmoqda”, dedi.
Eslatib o`tamiz, 20 sentyabr kuni Nyu-Yorkda (AQSh) BMT Bosh Assambleyasining 77-sessiyasi ish boshladi. Bir necha yil ichida birinchi marta u oflayn rejimda o`tkazilmoqda. Oldingi yillarda ishtirokchi davlatlar vakillari COVID-19 pandemiyasi tufayli onlayn tarzda sessiyalar o`tkazishga majbur bo`lgan. Bosh Assambleyaning 77-sessiyasi 26 sentyabr kuni yakunlanadi.
Ma`lumot uchun, Rossiya tashqi ishlar vaziri Lavrov BMT Bosh Assambleyasida ishtirok etish uchun maxsus samolyotda Nyu-Yorkka uchgan edi. Rossiya tashqi ishlar vaziri va uning delegasiyasi a`zolari so`nggi daqiqada Amerika vizalarini oldi. Qayd etilishicha, AQShda Rossiya TIV rahbari bilan 20 ga yaqin uchrashuvlar o`tkazish rejalashtirilgan.
