Shu yilning 19 sentyabr kuni O`zbekiston Respublikasi Prezidenti Shavkat Mirziyoev raisligida yurtimizning ichki va tashqi turizm salohiyatini yanada oshirish chora-tadbirlari yuzasidan o`tkazilgan videoselektor yig`ilishida shaharlar o`rtasida poezd va samolyot qatnovlarini ko`paytirish bo`yicha topishiriqlar berilgandi.
Namangan viloyatida ushbu topshiriqlar ijrosini ta`minlash, ichki turizmni rivojlantirish hamda aholiga qulay shart-sharoit yaratish maqsadida sharqiy Osiyo davlatlariga aviareyslar yo`lga qo`yilmoqda. Bu haqda O`zA yozmoqda.
Xususan, Kuvaytning “Jazeera Airways” milliy aviakompaniyasi bilan olib borilgan muzokaralar natijasida oktyabr oyidan e`tiboran Namangan – Al-Kuvayt – Namangan yo`nalishida ilk parvoz amalga oshirildi. Xalqaro parvozlar oldidan an`anaga ko`ra, aviakompaniya havo kemasi Namangan xalqaro aeroportida suv arkasi hosil qilingan holatda tantanali kutib olindi. Aviakompaniyaning “A-321” rusumli samolyoti Namangan havo darvozasidan Al-Kuvayt shahriga 160 nafar yo`lovchini olib ketdi.
Aviareys oldidan “Jazeera Airways” kompaniyasi, Namangan viloyati hokimligi, viloyat va madaniy meros boshqarmasi, Namangan xalqaro aeroporti mutasaddilari ishtirokida matbuot anjumani tashkil etilib, jurnalistlarni qiziqtirgan savollarga atroflicha javoblar qaytarildi.
Kuvayt aviakompaniyasining O`zbekistondagi vakili Ildar Abubakirovning qayd etishicha, Kuvayt va Namangan o`rtasidagi qatnovlar haftada uch marotaba (seshanba, payshanba va shanba kunlari) muntazam ravishda amalga oshirilishi rejalashtirilgan. Talab va ehtiyojdan kelib chiqib, ularning soni ko`paytirilishi mumkin.
Mazkur yo`nalish Namangan, umuman, vodiy aholisiga Fors ko`rfazi davlatlariga sayohat qilish uchun imkoniyat yaratadi. Qolaversa, umra safarini amalga oshirish istagidagi ziyoratchilar uchun ham o`ziga xos qulayliklar tug`diradi. Shuningdek, mamlakatimizda ishlab chiqarilayotgan mahsulotlarning Kuvaytga eksporti hajmini oshirish uchun qulay imkoniyatlar yaratadi.
Ma`lumot o`rnida, “Jazeera Airways” aviakompaniyasi 2004 yildan buyon Pokiston, Hindiston, Shri-Lanka, Nepal, Yaqin Sharq va Evropa davlatlariga parvozlarni amalga oshirib kelmoqda. Mazkur kompaniya tomonidan o`tgan yili Al-Kuvayt – Toshkent yo`nalishi bo`yicha reys ham yo`lga qo`yilgandi.
