Шу йилнинг 19 сентябрь куни Ўзбекистон Республикаси Президенти Шавкат Мирзиёев раислигида юртимизнинг ички ва ташқи туризм салоҳиятини янада ошириш чора-тадбирлари юзасидан ўтказилган видеоселектор йиғилишида шаҳарлар ўртасида поезд ва самолёт қатновларини кўпайтириш бўйича топишириқлар берилганди.
Наманган вилоятида ушбу топшириқлар ижросини таъминлаш, ички туризмни ривожлантириш ҳамда аҳолига қулай шарт-шароит яратиш мақсадида шарқий Осиё давлатларига авиарейслар йўлга қўйилмоқда. Бу ҳақда ЎзА ёзмоқда.
Хусусан, Кувайтнинг “Jazeera Airways” миллий авиакомпанияси билан олиб борилган музокаралар натижасида октябрь ойидан эътиборан Наманган – Ал-Кувайт – Наманган йўналишида илк парвоз амалга оширилди. Халқаро парвозлар олдидан анъанага кўра, авиакомпания ҳаво кемаси Наманган халқаро аэропортида сув аркаси ҳосил қилинган ҳолатда тантанали кутиб олинди. Авиакомпаниянинг “А-321” русумли самолёти Наманган ҳаво дарвозасидан Ал-Кувайт шаҳрига 160 нафар йўловчини олиб кетди.
Авиарейс олдидан “Jazeera Airways” компанияси, Наманган вилояти ҳокимлиги, вилоят ва маданий мерос бошқармаси, Наманган халқаро аэропорти мутасаддилари иштирокида матбуот анжумани ташкил этилиб, журналистларни қизиқтирган саволларга атрофлича жавоблар қайтарилди.
Кувайт авиакомпаниясининг Ўзбекистондаги вакили Илдар Абубакировнинг қайд этишича, Кувайт ва Наманган ўртасидаги қатновлар ҳафтада уч маротаба (сешанба, пайшанба ва шанба кунлари) мунтазам равишда амалга оширилиши режалаштирилган. Талаб ва эҳтиёждан келиб чиқиб, уларнинг сони кўпайтирилиши мумкин.
Мазкур йўналиш Наманган, умуман, водий аҳолисига Форс кўрфази давлатларига саёҳат қилиш учун имконият яратади. Қолаверса, умра сафарини амалга ошириш истагидаги зиёратчилар учун ҳам ўзига хос қулайликлар туғдиради. Шунингдек, мамлакатимизда ишлаб чиқарилаётган маҳсулотларнинг Кувайтга экспорти ҳажмини ошириш учун қулай имкониятлар яратади.
Маълумот ўрнида, “Jazeera Airways” авиакомпанияси 2004 йилдан буён Покистон, Ҳиндистон, Шри-Ланка, Непал, Яқин Шарқ ва Европа давлатларига парвозларни амалга ошириб келмоқда. Мазкур компания томонидан ўтган йили Ал-Кувайт – Тошкент йўналиши бўйича рейс ҳам йўлга қўйилганди.
