Ijtimoiy tarmoqlarda Samarqandda 15 sutkaga qamalib chiqqan fuqaro shifoxonada vafot etgani haqida xabarlar tarqaldi. Ularda uning o`limiga qamoqxonada olgan jarohati sabab bo`lgani aytilgan.
Viloyat IIB Axborot xizmatining holat bo`yicha bayonot berishicha, Oqdaryo tumni “Oytamg`ali” MFYda yashagan fuqaro B.R. Payariq tumani sudining 2021 yil 3 fevraldagi sud buyrug`iga asosan 2 nafar voyaga etmagan farzandlari voyaga etguniga qadar aliment to`lashi belgilangan bo`lsa-da, aliment va moddiy ta`minot pullarini to`lamasdan kelganligi aniqlangan.
Oqdaryo tuman sudining qarori bilan B.R.ga 15 sutka ma`muriy qamoq jazosi tayinlangan. B.R. ma`muriy tartibda qamoqqa olingan shaxslarni saqlash uchun mo`ljallangan Maxsus qabulxonaga 25 oktyabr kuni olib borilgan.
Maxsus qabulxonada B.R.ning tutqanog`i tutib, yiqilib, bosh devor burchagiga urilib, tan jarohati olgan.
"U bilan bir xonada saqlanayotganlar, shuningdek maxsus qabulxona xodimlari unga zudlik bilan birinchi tez tibbiy yordam ko`rsatishib, fuqaro RShTYoIM Samarqand filialiga olib borilib, unga tibbiy yordam ko`rsatilgan.
Maxsus qabulxonaga keltirilgandan so`ng ham fuqaro xona ichida o`ziga-o`zi gapirib, ruhiyatida buzilish bo`lgaligi sababli, Maxsus qabulxona boshlig`i xatiga asosan viloyat ruhiy kasalliklar shifoxonasiga uning ruhiy holatini tekshirish uchun yuborilgan.
28.10.2022 yil Urgut tumani “Halqobod” mahallasida joylashgan viloyat ruhiy kasalliklar shifoxonasida fuqaro vafot etgan", deyiladi rasmiy bayonotda.
Ta`kidlanishicha, ayni damda holat yuzasidan prokuratura organlari tomonidan tergovga qadar tekshiruv harakatlari olib borilmoqda. Marhumning o`limi sababiga aniqlik kiritish maqsadida sud-tibbiy ekspertizasi, IIB xodimlari va shifokorlarning harakatlari yuzasidan xizmat tekshiruvlari tayinlangan.
