Shu yil 7 noyabrdan akademik V.Vohidov nomidagi Respublika ixtisoslashtirilgan xirurgiya ilmiy-amaliy tibbiyot markazining konsultativ poliklinikasida xayriya tadbiri boshlandi.
12 noyabrga qadar davom etadigan ushbu aksiya davomida yurtimiz hamda chet elda jigar transplantasiyasi bajarilgan bemorlar, shu jumladan bolalar bepul tibbiy ko`rikdan o`tkaziladi. Bu haqda SSV xabar bermoqda.
Qayd etilishicha, mazkur maslahat va tekshiruvlar Xirurgiya markazi hamda Rossiyaning akademik V.I.Shumakov nomidagi Milliy transplantologiya va sun`iy organlar tibbiy tadqiqot markazining etakchi mutaxassislari bilan birgalikda amalga oshiriladi.
Ma`lum bo`lishicha, fuqarolar kun davomida soat 08:00 dan 17:00 gacha bo`ladigan tibbiy ko`riklarga +998712304560 va +998712304548 telefon raqamlari orqali navbatga yozilishlari mumkin.
- Manzil: Toshkent. Kichik halqa yo`li, 10-uy.
- Mo`ljal: Chilonzor metro bekati. Markaz konsultativ poliklinikasining 6 va 16-kabinetlari.
- "Yandex" geolokasiyasi: 41.273246, 69.210407
Eslatib o`tamiz, bemorlardan mavjud tibbiy hujjatlari(kasallik tarixidan ko`chirma, tekshiruv natijalari, elektron vositalar, shu jumladan CD-disklar)ni olib kelishlari so`raladi.
