Bugun, 9 noyabr kuni Samarqand shahrida Turkiy davlatlar tashkiloti sammiti doirasida Tashkilotga a`zo davlatlar iqtisodiyot va savdo vazirlarining 11-yig`ilishi bo`lib o`tdi.
Uchrashuvda Tashkilotga a`zo va kuzatuvchi davlatlarining iqtisodiy rivojlanishini jadallashtirish bo`yicha o`zaro hamkorlikni kuchaytirishning samarali yo`llarini aniqlash, jumladan, savdo, sarmoya, transport sohasidagi tashabbuslarni amalga oshirish va ko`p tomonlama munosabatlarning boshqa mexanizmlarini qo`llashga doir fikr mulohazalar almashildi, deya xabar bermoqda “Darakchi.uz” muxbiri.
Jarayondan ma`lum qilinishicha, yirik qo`shma loyiha va tashabbuslarni amalga oshirish uchun mustahkam asos bo`ladigan Turkiy davlatlar tashkilotining Investisiya jamg`armasini tashkil etish to`g`risidagi Bitimni imzolashni tezlashtirish bo`yicha kelishuvga erishildi.
Uchrashuv ishtirokchilari, shuningdek, ko`p tomonlama savdo aloqalarini rivojlantirish bo`yicha keyingi qadamlarni, ya`ni Tashkilot doirasida o`zaro savdoni oshirish bo`yicha umumiy kompleks yondashuvlarni amalga oshirishni ko`rib chiqishdi.
Ma`lumot o`rnida, bo`lajak birinchi Sammit doirasida “Savdoga ko`maklashish strategiyasi”imzolanishi rejalashtirilgan.
Vazirlar bu jarayonni amalga oshirish bo`yicha eng faol chora-tadbirlarni ko`rishga tayyorligini bildirildi.
Muloqot chog`ida ko`p tomonlama savdo-iqtisodiy munosabatlar barqarorligini ta`minlash chora-tadbirlari ham muhokama qilinib, ishtirokchilar ushbu yo`nalishning ustuvorligini hisobga olgan holda transport yo`laklari, bojxona va chegara o`tkazish punktlari va logistika markazlarining uzluksiz ishlashini ta`minlash bo`yicha a`zo davlatlar va Tashkilot kuzatuvchilarining yagona yondashuvi bo`yicha kelishuvlarga erishishgan.
Shu jumladan, TDT doirasida transport-logistika jihatidan o`zaro bog`liqligini yanada kengaytirish va rivojlantirish bo`yicha aniq chora-tadbirlar belgilab olindi.
Qayd etish lozim, vazirlar suhbatining bir qismi Tashkilot doirasidagi 2022-2026 yillarga mo`ljallangan Strategiyani muhokama qilishga bag`ishlangan.
Siyosiy, savdo-iqtisodiy, ijtimoiy, madaniy va xavfsizlik sohalarini rivojlantirishni qamrab oluvchi dasturiy hujjat ijrosini ta`minlash bo`yicha aniq chora-tadbirlar ko`rish bo`yicha kelishuvga erishildi, deydi muxbirimiz Dilbar Abdunabieva.
Tadbir yakunida ishtirokchilar o`zaro munosabatlarni yanada mustahkamlash, qo`shma loyiha va tashabbuslarni amalga oshirishni qo`llab-quvvatlash bo`yicha keng qamrovli amaliy chora-tadbirlar ko`rishga tayyor ekanlarini bildirishgan.
