Бугун, 9 ноябрь куни Самарқанд шаҳрида Туркий давлатлар ташкилоти саммити доирасида Ташкилотга аъзо давлатлар иқтисодиёт ва савдо вазирларининг 11-йиғилиши бўлиб ўтди.
Учрашувда Ташкилотга аъзо ва кузатувчи давлатларининг иқтисодий ривожланишини жадаллаштириш бўйича ўзаро ҳамкорликни кучайтиришнинг самарали йўлларини аниқлаш, жумладан, савдо, сармоя, транспорт соҳасидаги ташаббусларни амалга ошириш ва кўп томонлама муносабатларнинг бошқа механизмларини қўллашга доир фикр мулоҳазалар алмашилди, дея хабар бермоқда “Darakchi.uz” мухбири.
Жараёндан маълум қилинишича, йирик қўшма лойиҳа ва ташаббусларни амалга ошириш учун мустаҳкам асос бўладиган Туркий давлатлар ташкилотининг Инвестиция жамғармасини ташкил этиш тўғрисидаги Битимни имзолашни тезлаштириш бўйича келишувга эришилди.
Учрашув иштирокчилари, шунингдек, кўп томонлама савдо алоқаларини ривожлантириш бўйича кейинги қадамларни, яъни Ташкилот доирасида ўзаро савдони ошириш бўйича умумий комплекс ёндашувларни амалга оширишни кўриб чиқишди.
Маълумот ўрнида, бўлажак биринчи Саммит доирасида “Савдога кўмаклашиш стратегияси”имзоланиши режалаштирилган.
Вазирлар бу жараённи амалга ошириш бўйича энг фаол чора-тадбирларни кўришга тайёрлигини билдирилди.
Мулоқот чоғида кўп томонлама савдо-иқтисодий муносабатлар барқарорлигини таъминлаш чора-тадбирлари ҳам муҳокама қилиниб, иштирокчилар ушбу йўналишнинг устуворлигини ҳисобга олган ҳолда транспорт йўлаклари, божхона ва чегара ўтказиш пунктлари ва логистика марказларининг узлуксиз ишлашини таъминлаш бўйича аъзо давлатлар ва Ташкилот кузатувчиларининг ягона ёндашуви бўйича келишувларга эришишган.
Шу жумладан, ТДТ доирасида транспорт-логистика жиҳатидан ўзаро боғлиқлигини янада кенгайтириш ва ривожлантириш бўйича аниқ чора-тадбирлар белгилаб олинди.
Қайд этиш лозим, вазирлар суҳбатининг бир қисми Ташкилот доирасидаги 2022-2026 йилларга мўлжалланган Стратегияни муҳокама қилишга бағишланган.
Сиёсий, савдо-иқтисодий, ижтимоий, маданий ва хавфсизлик соҳаларини ривожлантиришни қамраб олувчи дастурий ҳужжат ижросини таъминлаш бўйича аниқ чора-тадбирлар кўриш бўйича келишувга эришилди, дейди мухбиримиз Дилбар Абдунабиева.
Тадбир якунида иштирокчилар ўзаро муносабатларни янада мустаҳкамлаш, қўшма лойиҳа ва ташаббусларни амалга оширишни қўллаб-қувватлаш бўйича кенг қамровли амалий чора-тадбирлар кўришга тайёр эканларини билдиришган.
