Avval xabar berganimizdek, Qatarda start olgan futbol bo`yicha Jahon chempionati kutilmagan voqealarga boy o`tmoqda.
Xususan, C guruhidan joy olgan Argentina — Saudiya Arabistoni bahsi kutilmagan hisob bilan yakunlandi — 1:2.
Saudiya Arabistoni qiroli terma jamoaning g`alabasi munosabati bilan ertaga, 23 noyabr kunini butun mamlakatda dam olish kuni deb e`lon qildi.
"Ertaga, chorshanba kuni davlat va xususiy sektor xodimlari hamda ta`limning barcha bosqichlarida tahsil olayotgan talabalar uchun dam olish kuni bo`lishi ko`rsatib o`tildi”, — deyiladi Saudiya axborot agentligining "Twitter"dagi sahifasida.
Biroq shu o`rinda biroz noxush xabar, Saudiya jamoasi a`zosi Yosir Al Shahroni to`qnashuv natijasida jag` suyaklari va tishlari singani ma`lum bo`ldi. Xabarlarga ko`ra, u tez orada operasiya qilinadi.
"U turnirda boshqa o`ynay olmasa kerak", — deya bu haqda yozmoqda futbol sharhlovchisi Davron Fayziev.
Eslatib o`tamiz, Saudiya Arabistoni 2-tur doirasida 26 noyabr kuni soat 18:00 da Polsha terma jamoasining "sinovidan o`tadi" (yoki Polshani sinovdan o`tkazadi — bunisi hozircha noma`lum). Argentina terma jamoasi esa navbatdagi turda meksikaliklar bilan to`qnash keladi (27 noyabr, 00:00). Hozircha C guruhida kutilmagan holat — Saudiya Arabistoni birinchi o`rinda turibdi.
