Rossiya Federal majlisi Davlat Dumasi Raisi bugun, O`zbekistonga rasmiy tashrif bilan keldi. “Samarqand xalqaro aeroporti”da yuqori martabali mehmonni Oliy Majlis Qonunchilik palatasi Spikeri N. Ismoilov kutib oldi.
Ma`lum qilinishicha, dastlab V.Volodin boshchiligidagi delegasiya a`zolari Qonunchilik palatasi Spikeri N. Ismoilov hamrohligida “Hazrat Hizr” majmuasida bo`lib, O`zbekiston Respublikasi Birinchi Prezidenti Islom Karimov qabrini ziyorat qildi.
Mehmonlar ko`hna va navqiron Samarqand shahrining diqqatga sazovar joylarida bo`lishdi. Samarqanddagi tarixiy va mahobatli binolar ularda katta taassurot qoldirgan.
Shuningdek, delegasiya a`zolari “Buyuk ipak yo`li” xalqaro turizm markazi, “Boqiy shahar” majmuasida ham bo`lishdi. Yangi markazdagi binolarda Buyuk ipak yo`li davriga oid tarixiy manzaralar aks ettirilgani, ayniqsa, har qanday sayyohni qadimiy afsonalar olamiga, tarixiy obidalar dunyosiga olib kiradigan tom ma`nodagi noyob loyiha — “Boqiy shahar” me`moriy ansambli mehmonlarning hayratiga sabab bo`ldi.
Shu bilan delegasiya a`zolari Samarqandga tashrifini yakunlab Toshketga uchib keldi.