Kinematografiya agentligi hamda O`zbekiston milliy kinematografiyani rivojlantirish markazi va “Kinomaniya” kinostudiyasi hamkorligida suratga olingan, rejissyor Muhammadiso Abdulxayirovning “Dada degin” filmini “Kinochilar uyi” kinoteatrida yopiq premerasi o`tkazildi. Bu haqda Kinematografiya agentligi Axborot xizmati xabar bermoqda.
Drama janrida suratga olingan mazkur kartinada uzoq yillardan buyon farzandsizlikdan qiynalayotgan oilada kechgan voqeliklar to`g`risida hikoya qilinadi. Bosh qahramon Botir aka o`zi befarzand ammo beshik yasovchi usta obrazida gavdalanadi. Uning hayotdan yagona ilinji farzandli bo`lish yohud bola tilidan chiqqan “dada” kalomini eshitish edi.
Uning farzandsizligi tufayli atrofidagilarning unga nisbatan yomon munosabati filmda yaqqol ko`zga tashlanadi.
Botir akaning rafiqasi Gavhar bolalar uyida tarbiyachi bo`lib ishlaydi. U ishlaydigan bolalar uyida Sardor ismli tarbiyalanuvchiga er-xotinning mehri tushib qolgan va oxir oqibat ular bolani asrab olishga qaror qilishadi.
Filmdagi asosiy konflikt bola asrab olish qaroridan so`ng boshlanadi. Bundan tashqari, beshik yasash sirlari, beshik uchun foydalaniladigan turli anjomlar va boshqa qiziqarli kadrlar filmdan joy olgan.
