Jahon chempioni bo`lgan amputant futbolchilar “Cobalt” avtomobili bilan taqdirlandi (foto va video)

Sport 03.12.2022, 16:52
Jahon chempioni bo`lgan amputant futbolchilar “Cobalt” avtomobili bilan taqdirlandi (foto va video)

Bugun, 3 dekabr kuni Milliy Paralimpiya qo`mitasida amputant futbolchilar o`rtasidagi jahon chempionatida bronza medalini qo`lga kiritgan O`zbekiston terma jamoasini taqdirlash marosimi bo`lib o`tdi.

Tadbirda O`zbekiston Respublikasi Prezidentining maslahatchisi Odil Abduraxmanov, Sportni rivojlantirish vaziri Adhkam Ikramov, Milliy Paralimpiya qo`mitasi raisi Muxtorxon Tashxodjaev, MOQ Bosh kotibi Oybek Kasimov, Qo`mita raisining birinchi o`rinbosari, O`FA birinchi vise-prezidenti Ravshan Irmatov, futbol bo`yicha O`zbekiston amutantlar terma jamoasi vakillari ishtirok etishdi.

Taqdirlash marosimi avvalida Adkham Ikramov Prezidentimiz aholining turli qatlamlari, xususan, imkoniyati cheklangan vatandoshlarimizga ko`rsatayotgan g`amxo`rligini bu yilgi Xalqaro nogironlar kunining o`zgacha qarshi olinayotganidan ko`rish mumkinligini ta`kidladi.

Rasmiylar terma jamoaning qo`lga kiritgan muvaffaqiyati bilan yana bir bor qutlab, ulardan kelgusida ham ulkan g`alabalar kutib qolishlarini bildirishdi. Shuningdek, amputant futbolchilarimizning bunday rag`batlantirilishi imkoniyati cheklangan boshqa hamyurtlarimizning sport bilan shug`ullanishlari uchun katta motivasiya bo`lishini alohida ta`kidlashdi.

Shundan so`ng tadbirning eng kulminasion nuqtasiga o`tildi. Unda qahramon sportchilarimizga Prezident sovg`asi – “Cobalt” mashinalari tantanali ravishda topshirildi.

Eslatib o`tamiz, sal avval ijtimoiy tarmoqlarda  tarqalgan "O`zbekiston jahon chempionlaridan yuz o`girdi" mavzusidagi videoda Turkiyada o`tgan amputantlar o`rtasidagi jahon chempionatida 3-o`rinni qo`lga kiritgan O`zbekiston futbol jamoasi a`zolari ularga etarlicha e`tibor qaratilmayotgani, faqat 10 mln so`mdan mukofot puli berilgani, boshqa chempionlardan farqli tazda odam ajratish bo`layotganidan norozi bo`lishgandi.

Katta shov-shuvlarga sabab bo`lgan bu murojaat sabab Sportni rivojlantirish vaziri Adham Ikromov  sportchilar bilan uchrashib, ularni qo`shimcha rag`batlantirilishiga va`da bergan edi.

Bugungi taqdirlovdan so`ng amputant futbolchilar davlat rahbariga ko`rsatilgan ushbu g`amxo`rlik uchun minnatdorlik bildirib, kelgusida ham ulkan g`alabalarni qo`lga kiritishga va`da berishdi.

Sharhlar