Бугун, 3 декабрь куни Миллий Паралимпия қўмитасида ампутант футболчилар ўртасидаги жаҳон чемпионатида бронза медалини қўлга киритган Ўзбекистон терма жамоасини тақдирлаш маросими бўлиб ўтди.
Тадбирда Ўзбекистон Республикаси Президентининг маслаҳатчиси Одил Абдурахманов, Спортни ривожлантириш вазири Адҳкам Икрамов, Миллий Паралимпия қўмитаси раиси Мухторхон Ташходжаев, МОҚ Бош котиби Ойбек Касимов, Қўмита раисининг биринчи ўринбосари, ЎФА биринчи вице-президенти Равшан Ирматов, футбол бўйича Ўзбекистон амутантлар терма жамоаси вакиллари иштирок этишди.
Тақдирлаш маросими аввалида Адкҳам Икрамов Президентимиз аҳолининг турли қатламлари, хусусан, имконияти чекланган ватандошларимизга кўрсатаётган ғамхўрлигини бу йилги Халқаро ногиронлар кунининг ўзгача қарши олинаётганидан кўриш мумкинлигини таъкидлади.
Расмийлар терма жамоанинг қўлга киритган муваффақияти билан яна бир бор қутлаб, улардан келгусида ҳам улкан ғалабалар кутиб қолишларини билдиришди. Шунингдек, ампутант футболчиларимизнинг бундай рағбатлантирилиши имконияти чекланган бошқа ҳамюртларимизнинг спорт билан шуғулланишлари учун катта мотивация бўлишини алоҳида таъкидлашди.
Шундан сўнг тадбирнинг энг кулминацион нуқтасига ўтилди. Унда қаҳрамон спортчиларимизга Президент совғаси – “Cобалт” машиналари тантанали равишда топширилди.
Эслатиб ўтамиз, сал аввал ижтимоий тармоқларда тарқалган "Ўзбекистон жаҳон чемпионларидан юз ўгирди" мавзусидаги видеода Туркияда ўтган ампутантлар ўртасидаги жаҳон чемпионатида 3-ўринни қўлга киритган Ўзбекистон футбол жамоаси аъзолари уларга етарлича эътибор қаратилмаётгани, фақат 10 млн сўмдан мукофот пули берилгани, бошқа чемпионлардан фарқли тазда одам ажратиш бўлаётганидан норози бўлишганди.
Катта шов-шувларга сабаб бўлган бу мурожаат сабаб Спортни ривожлантириш вазири Адҳам Икромов спортчилар билан учрашиб, уларни қўшимча рағбатлантирилишига ваъда берган эди.
Бугунги тақдирловдан сўнг ампутант футболчилар давлат раҳбарига кўрсатилган ушбу ғамхўрлик учун миннатдорлик билдириб, келгусида ҳам улкан ғалабаларни қўлга киритишга ваъда беришди.
