O`zbekiston Respublikasi Kinematografiya agentligi va Ozarboyjon Respublikasi Madaniyat vazirligi tashabbusi bilan joriy yilning 7-10 dekabr kunlari Boku shahrida O`zbek kinosi kunlari bo`lib o`tmoqda.
6 dekabr kuni bir guruh kinoijodkorlar Ozarboyjon poytaxtiga etib kelishdi. Kinematografiya agentligi bosh direktori Firdavs Abduxoliqov rahbarligidagi hay`at tarkibidan O`zbekistonda xizmat ko`rsatgan artist Lola Eltoeva, kinorejissyorlar Eldor Mamedov, Dilmurod Masaidov, kinojurnalistlar Feruza Nodirova, Shoira Raufboeva va boshqalar o`rin olgan. Dastlab o`zbek kinoijodkorlari Ozarboyjon milliy kino fondiga tashrif buyurishdi.
Kino fondi rahbari Jamila Guliev ikki mamlakat kino fondi xamkorligi uzoq tarixga ega ekanligi, so`nggi yillarda bu hamkorlik tobora rivojlanib borayotganini qayd etdi. O`zbekiston Respublikasi Kinomatografiya agentligi bosh direktori Firdavs Abduxoliqov samimiy qabul va mehmondo`stlik uchun minnatdorlik bildirib, hamkorlik uchun barcha imkoniyatlar safarbarlik qilinishini qayd etdi.
Firdavs Abduxoliqov Ozarboyjon milliy kino fondi rahbariga "O`zbekiston kino san`ati" kitob-albomini taqdim etdi.
Kino kunlari doirasida ozarboyjonlik kino muxlislariga "Azaliy do`stlik va qardoshlik", "Ayol qismati", "Faridaning 2000 qo`shig`i", "Baron 2: Sog`inch", "Maqsud Shayxzoda" singari badiiy va hujjatli filmlar namoyish etilishi kutilmoqda.
