O`zbekistonda so`z mulkining sultoni, mutafakkir, davlat arbobi Nizomiddin Mir Alisher Navoiy tavalludining 582 yilligi nishonlanmoqda. Ulug` bobomiz hayoti va ijodiy faoliyatiga bag`ishlangan turli adabiy kechalar, mushoiralar, ma`naviy-ma`rifiy tadbirlar o`tkazilmoqda.
Shu munosabat bilan Madaniyat va turizm vaziri Ozodbek Nazarbekov Toshkentdagi Adiblar xiyobonida Alisher Navoiy haykali poyiga gul qo`yib, hurmat bajo keltirdi.
Vazirga O`zbekiston Yozuvchilar uyushmasi raisi Sirojiddin Sayyid, O`zbekiston va Qoraqalpog`istonda xizmat ko`rsatgan artist Ra`no Yarasheva va boshqalar hamrohlik qildi.
Gul qo`yish marosimidan so`ng O`zbekiston Yozuvchilar uyushmasida adabiy-ma`rifiy tadbir bo`lib o`tdi. Unda keyingi yillarda Alisher Navoiyning boy va serqirra ijodiy merosini har tomonlama chuqur o`rganish, uning o`lmas asarlarini yurtimizda va xorijiy mamlakatlarda keng targ`ib qilish borasida qator ishlar amalga oshirilayotgani ta`kidlandi. Jumladan, kecha taqdimoti o`tkazilgan “Istiqlol davri o`zbek navoiyshunosligi” 30 jildlik to`plami ham shunday ezgu sa`y-harakatlarning yana bir yorqin ifodasi ekani qayd etildi.
Tadbirda buyuk shoir ijodidan namunalar o`qilib, g`azallari asosida ijro etilgan mumtoz qo`shiqlar yangradi.
