O`zbekiston Prezidenti Administrasiyasi Ijro etuvchi apparatining Kommunikasiyalar va axborot siyosati bo`yicha sho`ba mudiri Saida Mirziyoeva Janubiy va Markaziy Osiyo ishlari bo`yicha AQSh davlat kotibi yordamchisi Donald Lu bilan uchrashdi. Bu haqda u Telegram'dagi sahifasida ma`lum qildi.
Qayd etilishicha, ushbu uchrashuvda O`zbekiston va AQSh o`rtasida ta`lim sohasida to`plangan ko`p yillik o`zaro sa`y-harakatlar, shu sohada O`zbekistonda hozirgi vaqtda kechayotgan islohotlar va kelgusi hamkorlik masalalari muhokama qilingan.
“Men, Prezident Administrasiyasining Ta`lim strategiyasini ishlab chiqish hamda amalga oshirish ishlarini muvofiqlashtiruvchi xodimi sifatida o`zim uchun bolalar va yoshlarda tanqidiy fikrlashni rivojlantirish ustuvor ahamiyatga ega ekanligini qayd etdim”, deydi Mirziyoeva.
Shuningdek, muloqot damomida madaniy merosni asrash, OAV va so`z erkinligini rivojlantirish kabi muhim masalalarga ahamiyat qaratilib, holatni yaxshilash uchun mamlakatlar birgalikda ishtirok etishi mumkinligi qayd etilgan.
