Avvalroq, ijtimoiy tarmoqda bir yigit mashina haydayotgan vaqtida qo`liga o`yinchoq to`pponchani olib, qo`lini oynadan chiqargan holda turli harakatlar qilgani aks etgan video tarqaldi.
Qashqadaryo viloyati IIB Matbuot xizmatining xabar qilishicha, olib borilgan surishtiruvlar natijasida huquqbuzar haydovchining shaxsiga aniqlik kiritilib, qo`lga olingan.
"24 may kuni Shahrisabzda o`zimning mashinamda harakatlanib ketayotganimda mashinalar menga yo`l bermagani uchun ularni quvib o`tdim. Shunda ham yo`l bermay, o`yin qilgani sabab shu o`yinchoq pistoletni chiqarib ketdim. Pistoletni Toshkentdan internet orqali qiziqish uchun zakaz qilib olgandim. Ahmoqlik qildim, qilgan ishimdan pushaymonman”, - deydi huquqbuzar yigit.
Holat Jinoyat ishlari bo`yicha Shahrisabz shahar sudida ko`rib chiqildi. Yigit MJtKning 125-moddasi 3-qism, 128-moddasi 3-qism va 180-moddalarida nazarda tutilgan huquqbuzarliklarni sodir etgan deb topilib, unga 5 sutka ma`muriy qamoq jazosi tayinlandi.
