Yurtimiz hududlarida 46 ta tumanlararo perinatal markaz tashkil etilishi belgilangan. Prezidentimizning tegishli qarori asosida shakllantirilgan ushbu markazlar ro`yxatiga Toshkent tumani tug`uruq kompleksi ham kiritilgan edi.
1 iyun — Xalqaro bolalarni himoya qilish kuni munosabati bilan o`tkazilgan tantanali ochilish marosimida Toshkent viloyati hokimi Zoir Mirzaev va Sog`liqni saqlash vaziri Amrillo Inoyatov ishtirok etdi.
Shu paytgacha Toshkent viloyatining Bekobod, Yangiyo`l, Olmaliq shaharlari va Quyi Chirchiq tumanida tumanlararo perinatal markazlar tashkil etilgan edi.
Bunga qadar 110 o`rinli Toshkent tumani tug`uruq kompleksida yiliga 5,5 mingga yaqin tug`uruq qayd etilib, faqatgina shu hudud aholisiga xizmat ko`rsatgan.
Shifoxona asosan asoratsiz tug`uruqlarni qabul qilishga mo`ljallangan bo`lib, asoratli va kam vazn bilan tug`ilgan chaqaloqlar respublika muassasalariga va Chirchiq shahrida joylashgan viloyat perinatal markaziga 50-70 km. masofa bosib olib borilar edi.
Albatta, tug`uruq majmuasini perinatal markazga aylantirish oson emas. Buning uchun qator texnik va malakaviy talablar mavjud. Muassasani zamonaviy standartlarga mos holga keltirish uchun 18,2 mlrd. so`m investisiya dasturi doirasida mablag` sarflandi.
Markaz zamonaviy tibbiy asbob-uskunalar bilan to`liq jihozlandi. Buning uchun 2,1 mlrd. so`m mablag` ajratildi.
Tug`uruqdan keyingi xonalar zamonaviy holatga keltirilib, har biriga alohida sanuzel o`rnatildi.
Muassasada qo`shimcha 10 o`rinli “Chaqaloqlar patologiyasi” va 6 o`rinli “Chaqaloqlar reanimasiyasi” bo`limlari tashkil etildi.
Bu esa og`ir ahvolda va kam vaznli tug`ilgan chaqaloqlarga o`z vaqtida va samarali tibbiy xizmat ko`rsatish imkonini yaratadi.
Bundan tashqari, markazning 35 nafar shifokori respublika muassasalarida alohida tashkil etilgan o`quv kurslarida tibbiy malakalarini oshirib qaytdi.
Tumanlararo perinatal markaz mutaxassislari o`z oldiga Toshkent tumanidan tashqari, Qibray va Zangiota tumanida yashovchi ayollar hamda muddatidan avval tug`ilgan go`daklar uchun ixtisoslashtirilgan reanimasion va intensiv xizmatlarni tashkil etish, kam vaznli chaqaloqlarni parvarish va reabilitasiya qilish, asoratli tug`uruq kutilayotgan homilador ayollar uchun malakali tibbiy xizmat ko`rsatish kabi maqsadlarni qo`ygan.
