Toshkentlik ayol, turk aktyori Burak Ozchivit bilan bir kecha qolish evaziga 100 ming AQSh dollari pulni firibgarga berib yuborgani haqida xabar tarqaldi.
Tarqatilayotgan xabarga ko`ra, instagramda aktyorning soxta sahifasida administrator ayolga Burak bilan uchrashuv tashkil qilinishini va`da berib, o`ziga tegishli VISA kartaga 100 ming AQSh dollari o`tkazishi kerakligini aytadi.
Ayol o`zining tilla taqinchoqlarini sotib, yana eri yig`ib quygan pullarni ham olib, hech kimga bildirmay bankka boradi va soxta administrator aytgan karta raqamga pullarni o`tkazib yuboradi. “Burakning Administratori” ayolga qo`ng`iroq qilib, “yana 50 ming dollar o`tkazing, yaqin kunlarda Istanbuldagi qimmatbaho mehmonxonaning eng lyuks xonasida aktyor bilan birga bo`lasiz” deydi. Ayol chuv tushganini fahmlaydi va darhol Shayhontohur tuman IIBga ariza bilan murojaat qilib, firibgarlarga aldanganidan shikoyat qiladi.
"darakchi.uz" holatga aniqlik kiritish maqsadida, tarqalayotgan xabar nechog`lik haqiqat ekanini so`rab IIV matbuot kotibi Shoxruh G`iyosov bilan bog`landi.
"Feyk bu, Rossiyada shunga o`xshash xolat bo`lgan, shuni plagiat qilib O`zbekistondagi telegram kanaldan biri chiqargan, qolganlar undan ko`chirgan. Shayhontohur tuman IIBga bu mazmundagi hech qanday murojaat kelib tushmagan", - deya javob berdi IIV matbuot kotibi.
"darakchi.uz" avvalroq Rossiyada tarqalgan shu mazmundagi xabarga e`tibor qaratdi.
Undagi xabarga ko`ra, rus qiz "aktyor Rayan Gosling" bilan uchrashuv uchun deyarli 300 000 rubl to`laydi.
Rayan Goslingning yordamchisi shaxsiy xabarida chuvashiyalik qizga yozgan. Kanadalik aktyorning yordamchisi muxlisga Rayan u bilan shaxsan uchrashish uchun Rossiyaga uchib ketmoqchiligini aytadi.
Muxlis qarz oladi, firibgarlarga 300 ming rubl pul yubordi va Ken bilan o`z vatanida uchrashishga tayyorlandi. Ammo suhbatdosh yana 200 ming talab qilib, uni shantaj qila boshlaganida rus qiz aldanganini tushunadi.
