O`zbek san`atining afsonalaridan biri bo`lmish “Yalla” ansambli 10-11-12 oktyabr kunlari konsert berishi rejalashtirilgan. Xo`sh, uzoq kutilgan konsert nega an`anaviy tarzda "Xalqlar do`stligi" yoki so`nggi paytda odatga aylanayotgan Forumlar saroyida emas, balki Kasaba uyushmalari saroyida bo`ladigan bo`ldi? Kutilayotgan konsertda qanday yangiliklar bo`ladi? “Yalla” ansambli ijodkorlari muxlislari uchun qanday syurprizlar tayyorlashmoqda? Ayni mana shu savollarga javob olish maqsadida ansambl rahbari Farruh Zokirov bilan suhbatlashdik.
- Nima uchun “Yalla” ansambli konsert berish uchun “Xalqlar do`stligi” yoki “Humo arena” kabi joylarni emas, aynan Kasaba uyushmalari saroyini tanladi?
- Ayni eng muhim savolni berdingiz. Haqiqatdan yaxshi savol: nimaga bu erdamiz? Sababi, “Yalla” ansamblining butun tarixi, eng avvalo, mana shu saroydan boshlangan. Ilgari bu er Toshkentning eng madaniy markazlaridan biri hisoblanardi. Bu saroy biz uchun juda katta bir qadr va e`tiborga ega bo`lgan joy. Biz anchadan beri tomoshabinlarimiz bilan ko`rishmaganligimiz uchun yana o`zimizning konsert faoliyatimizni shu saroyda davom ettiirmoqchimiz.
- Konsert davomida yangi qo`shiqlar ham yangraydimi?
- Albatta, yangi qo`shiqlar bor. Lekin aytib o`tishim kerak konsert repertuaridan xalq sevgan o`sha “Majnuntol”, “Uchquduq” va “Choyxona” kabi qo`shiqlarimiz ham joy egallagan.
- Qaysidir qo`shig`ingizni yosh xonanda so`rab kelganda “men kuylay” deb, ruhsat bermagan paytingiz bo`lganmi?
- Yo`q! Umuman bo`lmagan. Ustoz, shu qo`shig`ingizni aytsam maylimi, deb kelishsa, har doim bemalol, jon ukam, jon bolam aytaver. Faqat bitta iltimos, buzmasdan aytsang, men xursand bo`laman, deyman.
- Yaqinda Umidaxon bilan kuylagan duetingiz ko`pchilikka ma`qul keldi. Yana duetlar kuylash taklifi bo`lyaptimi?
- Albatta, ustoz, duet yarataylik deb ko`p iltimos qilishadi. Endi agar u bir reklama uchunms yoki bir qandaydir boshqa sabablar uchun bo`lmasa, yuragim jiz etadigan bir g`oya, taklif bo`ladigan bo`lsa, albatta aytaman. Bosh ustiga.
- Oktyabrda beriladigan konsertda ham duetlar bo`ladimi?
- Yo`q. Chunki bu konsertni biz “solniy” konsert deb e`lon qilganmiz. Shuning uchun, rostini aytsam, biz anchadan beri muxlislarni ko`rmadik, sog`inganmiz. Bu konsert dasturi ijobiy hisobotga o`xshagan tarzda o`tadi. Muxlislarbilan suhbatlashib, birga kuylab, ular bilan jonli muloqot tarzida o`tkazishni reja qilganmiz. Agar bitta-yarimtani duetga chaqiradigan bo`lsak, yana boshqalarni ham taklif qilishga to`g`ri keladi. Mana Nasibaxon Abdullaeva bilan duetimiz bor. Nasibaxon Abdullaevaning taklifi bilan yaratilgan bu duet, ya`ni Botir akamning qo`shiqlarini birgalikda aytamiz. Men har doim bajonidil ijro etaman. Lekin bu konsert boshqacha bo`ladi, duetlarsiz.
- Shu o`rinda eslab o`tish joiz deb bildim, yaqinda o`zbek san`ati og`ir judolikka uchradi. Sherali Jo`raev olamdan o`tdilar. Alloh rahmatiga olgan bo`lsin. Farruh Zokirov Sherali Jo`raevni qanday voqealar bilan eslaydi?
- Avvalambor, o`tganlarni Alloh rahmat qilsin. Joylari jannatda bo`lsin. Sherali Jo`raev buyuk san`atkor! Bu o`zbek millatini faxri. O`zbek san`atini faxri. Adashmasam, 1971 yillar edi. “Yalla” endi tashkil qilingan paytlar. Hozir bir voqeani aytib beraman. Termizda juda katta konsert bo`lyapti. Eng ko`zga ko`ringan san`atkorlar qatnashyapti. Biz ham qatnashyapmiz va katta konsert bo`lganligi uchun o`sha eng buyuk san`atkorlar ham bitta yo ikkita qo`shiq aytishyapti. “Yalla”ni eng gullagan paytlari edi. Biz sahnaga chiqib 3-4 ta qo`shiq aytdik. Bir payt e`lon qilishdi: Endi navbat Sherali Jo`raevga degandi. Butun stadion, muxlislar o`rnidan turib, qarsak chaldi.o`sha katta konsertda hamma 1-2 ta qo`shiq aytyapti, Sherali Jo`raev 15 ta qo`shiq aytdi. Shu voqeani o`zi kifoya deb o`ylayman. Ko`p konsertlarda bu inson bilan birga ishtirok etganmiz, qatnashganmiz. Bu inson haqiqiy vatan farzandi. Milliy yo`nalishdagi eng qadrli san`atkorlaridan biri deb hisoblayman. Alloh rahmat qilgan bo`lsin!
- Mazmunli suhbat uchun tashakkur. Konsertda ko`rishguncha.
- Rahmat. Salomat bo`ling!
Mohinur RUSTAMOVA suhbatlashdi
