Ўзбек санъатининг афсоналаридан бири бўлмиш “Ялла” ансамбли 10-11-12 октябрь кунлари концерт бериши режалаштирилган. Хўш, узоқ кутилган концерт нега анъанавий тарзда "Халқлар дўстлиги" ёки сўнгги пайтда одатга айланаётган Форумлар саройида эмас, балки Касаба уюшмалари саройида бўладиган бўлди? Кутилаётган концертда қандай янгиликлар бўлади? “Ялла” ансамбли ижодкорлари мухлислари учун қандай сюрпризлар тайёрлашмоқда? Айни мана шу саволларга жавоб олиш мақсадида ансамбль раҳбари Фарруҳ Зокиров билан суҳбатлашдик.
- Нима учун “Ялла” ансамбли концерт бериш учун “Халқлар дўстлиги” ёки “Ҳумо арена” каби жойларни эмас, айнан Касаба уюшмалари саройини танлади?
- Айни энг муҳим саволни бердингиз. Ҳақиқатдан яхши савол: нимага бу ердамиз? Сабаби, “Ялла” ансамблининг бутун тарихи, энг аввало, мана шу саройдан бошланган. Илгари бу ер Тошкентнинг энг маданий марказларидан бири ҳисобланарди. Бу сарой биз учун жуда катта бир қадр ва эътиборга эга бўлган жой. Биз анчадан бери томошабинларимиз билан кўришмаганлигимиз учун яна ўзимизнинг концерт фаолиятимизни шу саройда давом эттиирмоқчимиз.
- Концерт давомида янги қўшиқлар ҳам янграйдими?
- Албатта, янги қўшиқлар бор. Лекин айтиб ўтишим керак концерт репертуаридан халқ севган ўша “Мажнунтол”, “Учқудуқ” ва “Чойхона” каби қўшиқларимиз ҳам жой эгаллаган.
- Қайсидир қўшиғингизни ёш хонанда сўраб келганда “мен куйлай” деб, руҳсат бермаган пайтингиз бўлганми?
- Йўқ! Умуман бўлмаган. Устоз, шу қўшиғингизни айтсам майлими, деб келишса, ҳар доим бемалол, жон укам, жон болам айтавер. Фақат битта илтимос, бузмасдан айтсанг, мен хурсанд бўламан, дейман.
- Яқинда Умидахон билан куйлаган дуэтингиз кўпчиликка маъқул келди. Яна дуэтлар куйлаш таклифи бўляптими?
- Албатта, устоз, дуэт яратайлик деб кўп илтимос қилишади. Энди агар у бир реклама учунмс ёки бир қандайдир бошқа сабаблар учун бўлмаса, юрагим жиз этадиган бир ғоя, таклиф бўладиган бўлса, албатта айтаман. Бош устига.
- Октябрда бериладиган концертда ҳам дуэтлар бўладими?
- Йўқ. Чунки бу концертни биз “солний” концерт деб эълон қилганмиз. Шунинг учун, ростини айтсам, биз анчадан бери мухлисларни кўрмадик, соғинганмиз. Бу концерт дастури ижобий ҳисоботга ўхшаган тарзда ўтади. Мухлисларбилан суҳбатлашиб, бирга куйлаб, улар билан жонли мулоқот тарзида ўтказишни режа қилганмиз. Агар битта-яримтани дуэтга чақирадиган бўлсак, яна бошқаларни ҳам таклиф қилишга тўғри келади. Мана Насибахон Абдуллаева билан дуэтимиз бор. Насибахон Абдуллаеванинг таклифи билан яратилган бу дуэт, яъни Ботир акамнинг қўшиқларини биргаликда айтамиз. Мен ҳар доим бажонидил ижро этаман. Лекин бу концерт бошқача бўлади, дуэтларсиз.
- Шу ўринда эслаб ўтиш жоиз деб билдим, яқинда ўзбек санъати оғир жудоликка учради. Шерали Жўраев оламдан ўтдилар. Аллоҳ раҳматига олган бўлсин. Фарруҳ Зокиров Шерали Жўраевни қандай воқеалар билан эслайди?
- Авваламбор, ўтганларни Аллоҳ раҳмат қилсин. Жойлари жаннатда бўлсин. Шерали Жўраев буюк санъаткор! Бу ўзбек миллатини фахри. Ўзбек санъатини фахри. Адашмасам, 1971 йиллар эди. “Ялла” энди ташкил қилинган пайтлар. Ҳозир бир воқеани айтиб бераман. Термизда жуда катта концерт бўляпти. Энг кўзга кўринган санъаткорлар қатнашяпти. Биз ҳам қатнашяпмиз ва катта концерт бўлганлиги учун ўша энг буюк санъаткорлар ҳам битта ё иккита қўшиқ айтишяпти. “Ялла”ни энг гуллаган пайтлари эди. Биз саҳнага чиқиб 3-4 та қўшиқ айтдик. Бир пайт эълон қилишди: Энди навбат Шерали Жўраевга деганди. Бутун стадион, мухлислар ўрнидан туриб, қарсак чалди.ўша катта концертда ҳамма 1-2 та қўшиқ айтяпти, Шерали Жўраев 15 та қўшиқ айтди. Шу воқеани ўзи кифоя деб ўйлайман. Кўп концертларда бу инсон билан бирга иштирок этганмиз, қатнашганмиз. Бу инсон ҳақиқий ватан фарзанди. Миллий йўналишдаги энг қадрли санъаткорларидан бири деб ҳисоблайман. Аллоҳ раҳмат қилган бўлсин!
- Мазмунли суҳбат учун ташаккур. Концертда кўришгунча.
- Раҳмат. Саломат бўлинг!
Моҳинур РУСТАМОВА суҳбатлашди
