O`zbekiston madaniy merosini o`rganish, saqlash va ommalashtirish bo`yicha Butunjahon jamiyati (WOSCU), O`zbekiston Respublikasi Fanlar akademiyasi va Abu Rayhon Beruniy nomidagi Sharqshunoslik instituti bilan hamkorlikda “O`zbekiston obidalaridagi bitiklar” turkumidagi kitoblar taqdimot marosimi o`tkazildi.
Loyihaning amalga oshirilishi
Ushbu faoliyat mamlakatimiz tarixiy obidalarida yozilgan qadimiy bitiklarni o`rganishga qaratilgan. Bugungi kunga qadar O`zbekistonning barcha hududlariga bag`ishlangan, o`zbek, rus, arab va ingliz tillaridagi 20 ta ko`p tilli kitob-albomlar nashr etildi.
Tadbir davomida doktor Baxtiyor Bobojonov maxsus taqdimot bilan ishtirok etdi. “Izlanishlarimiz davomida mingdan ortiq hunarmand, me`mor, rassom, xattot va shoirlarning nomlarini aniqlashimiz mumkinligi xayolimizga ham kelmagan edi! Biz bunyodkorlar va saxovatpesha homiylarning ism-shariflarini, ko`p hollarda yodgorliklarni kim va nima uchun barpo etganini aniqlashga muvaffaq bo`ldik. Bu kitoblar ortidan xorijdan faqat maqtov, ijobiy fikrlarni eshityapmiz va tadqiqotlarimiz mahsuliga talab yuqori bo`lishiga ishonamiz”, – dedi doktor Baxtiyor Bobojonov.
Nashrlar orasida Qoraqalpog`iston, Andijon, Buxoro, Qashqadaryo, Navoiy, Namangan, Surxondaryo, Farg`ona, Xorazm, Toshkent viloyatlari va Toshkent shahri me`moriy yodgorliklaridagi epigrafik bitiklarga bag`ishlangan kitob-albomlar, Samarqand me`moriy tarixiy majmualari – Registon va Shohizindaga bag`ishlangan albomlar bor.
“Bugun ushbu nashr etilgan kitoblar tufayli biz yurtimiz obidalaridagi tarixiy bitiklarning mazmun-mohiyatini angladik. Har bir viloyatning yodgorliklariga bag`ishlangan albomlarning nashr etilishi tariximiz va merosimizni anglashda yangi ufqlarni ochadigan chinakam ezgu ishdir. Endi bizda ajdodlarimiz tomonidan qoldirilgan tarixiy nomalarni tushunishga yordam beradigan ajoyib nashrlar mavjud. Ishonchim komilki, bu kitoblar har bir yoshning o`z madaniyat ildizlariga yaqinlashishi, bilimini boyitishiga yordam beradi, ularda ajdodlarimiz bizga qoldirgan meros bilan faxrlanish tuyg`usini uyg`otadi”, – deydi Oliy Majlis Senatining Fan, ta`lim va sog`liqni saqlash masalalari qo`mitasi raisi Odiljon Karimovich Eminov.
Loyiha faoliyati natijasi o`laroq, O`zbekistonning 2000 dan ortiq me`moriy yodgorliklaridagi yozuvlar tarjima qilindi. Ular orasida she`rlar va she`riy iboralar, nasihatlar, ezgu tilaklar va hikmatli so`zlar, ustoz va xattotlar ism-shariflari, diniy va bag`ishlov bitiklari, tarixiy voqealar xronogrammasi va hukmdorlar farmonlari mavjud. Mutaxassislar epigrafik materiallarning ulkan miqdorini topib, o`rganib, ma`nosini chaqibgina qolmay, turkiy, arab va fors tillaridagi bitiklarning dastlabki o`qilishi va tarjimalarini ham to`g`rilab, boyitishdi.
“Bu loyihada men Andijon, Farg`ona, Namangan kitoblarini yozgan muallif bo`lib qatnashgaman. Bugun guvohi bo`lganingizdek tadbirda ishtirok etganlarga sertifikatlar taqdim etildi. Buni tarqatishdan maqsad nima? Bu chiqarilgan kitoblar xalqqa etib borishi kerak. Muayan bir doiraning ichida qolib ketmaslig kerak. Bu erda bizning shonli o`tmishimiz haqida ma`lumotlar eg`ilgan.
Binolarning tarixi, ulardagi bitiklarning talqini 3 tilda tarjim qilindi. Bu bugungi kungacha yaratilgan tariximizning yangi ma`lumotlar bilan to`ldirishga, yangi ma`lumotlarni xalqqa etkazishga xizmat qiladi va yana bir tomoni xalqaro va ichki turizmni rivojlantirishga xizmat qiladi. Ilmiy tomondan qaraydigan bo`lsak, yangi ilmiy mavzularni ishlashga asos bo`ladi”, - deydi Abu Rayxon Beruniy nomidagi shaqshunoslik instituti bo`lim boshlig`i Salimaxon Eshonova.
Media-ivent O`zbekiston vazirliklari, idoralari va tashkilotlariga – jami 100 dan ortiq tashkilot vakillariga “O`zbekiston obidalaridagi bitiklar” turkumidagi 20 jildlik kitob-albomlarni bepul olish uchun sertifikatlarni tantanali topshirish marosimi bilan yakunlandi.
