Mamlakatimizga aksiz markalari bilan markalanmagan tamaki mahsulotlarining noqonuniy olib kirilishi, saqlanishi va aylanishiga ushbu faoliyatni amalga oshiruvchi hamda unda ishtirok etuvchi organlar tomonidan tizimli ravishda qarshi kurash olib borilmoqda.
Jumladan, O`zbekiston Respublikasining «Alkogol va tamaki mahsulotlarining tarqatilishini hamda iste`mol qilinishini cheklash to`g`risida»gi qonunining 14-moddasida bojxona organlariga alkogol va tamaki mahsulotlarining, tamakini hamda nikotinni iste`mol qilish moslamalarining aylanishi jarayonida bojxona to`g`risidagi qonunchilikka rioya etilishi ustidan nazoratni amalga oshirish, ularni mamlakatimiz hududiga qonunga xilof ravishda olib o`tilishining oldini olish, uni aniqlash va unga chek qo`yish bo`yicha tadbirlarni amalga oshirish vakolati berilgan.
Qonun ijrosini ta`minlash maqsadida Andijon viloyati bojxona boshqarmasi tomonidan bojxona chegaralari orqali tamaki mahsulotlarining noqonuniy olib kirilishi, saqlanishi va aylanishiga qarshi muntazam tezkor tadbirlar o`tkazilmoqda.
Andijon viloyati bojxona boshqarmasi katta inspektori Sardorbek O`rinboevning ta`kidlashicha, 2023 yil davomida boshqarma tomonidan huquqni muhofaza qiluvchi organlari hamkorligida tamaki mahsulotlarini noqonuniy aylanishi bilan bog`liq 33 ta huquqbuzarlik holatlari aniqlanib, umumiy miqdori 30437 quti, qiymati 1 mlrd 652 mln 547 ming so`mlik tamaki mahsulotlari ushlab qolingan. Aniqlangan holatlar yuzasidan ikkita holatda huquqbuzarlarga nisbatan Jinoyat Kodeksining tegishli moddalari bo`yicha jinoyat ishi qo`zg`atilgan.
2024 yil 16 aprel kuniga qadar boshqarma tomonidan tamaki mahsulotlarini noqonuniy aylanishi bilan bog`liq 13 ta huquqbuzarlik holatlari aniqlanib, ular bo`yicha umumiy miqdori 17900 quti, qiymati 188 mln 922 ming so`mlik tamaki mahsulotlari ushlab qolingan.
- Joriy yilning o`tgan davri mobaynida esa Bojxona boshqarmasi xodimlari tomonidan 13 holatda 17900 ta qutida umumiy qiymati 189 mln so`mni tashkil etuvchi tamaki mahsulotlarining O`zbekiston Respublikasi hududiga noqonuniy kirib kelishi hamda aylanmasining oldi olindi, — deydi Sardorbek O`rinboev. – Bu boradagi ishlar tizimli ravishda davom etmoqda.
Mazkur yo`nalish bo`yicha soliq organlari tomonidan ham savdo va xizmat ko`rsatish ob`ektlarida alkogol va tamaki mahsulotlarining, tamakini hamda nikotinni iste`mol qilish moslamalarining qonunga xilof ravishda aylanishining oldini olish, uni aniqlash va unga chek qo`yish bo`yicha tadbirlar amalga oshirilmoqda.
- Andijon viloyatida jami 40 ta tamaki mahsulotlari hamda 274 ta alkogol savdosi bilan shug`ullanuvchi savdo ob`ektlari mavjud. Soliq xizmati organi tomonidan alkogol va tamaki yo`nalishda yil davomida 193 ta tekshirish o`tkazilgan bo`lib, aniqlangan huquqbuzarliklar yuzasidan tadbirkorlarga nisbatan 116 milliard 825 million 664 ming so`mlik jarima qo`llanilgan. Shuningdek, o`tkazilgan sayyor soliq tekshiruvlarida alkogol savdosi bo`yicha 70 ta tekshirishda 116 mlrd 738 mln 183 ming so`mlik, tamaki savdosi bo`yicha 8 ta tekshirishda esa 87 mln 481 ming so`mlik jarima qo`llanilgan.
Bundan tashqari soliq xizmati organi xodimlari tomonidan noqonuniy tamaki savdosini aniqlash yuzasidan 2023 yilda o`tkazilgan reyd tadbirlari davomida 88 ta sub`ektning aynan qaysi korxonalar tomonidan ishlab chiqarilganligi hamda sifatini kafolatlovchi biror-bir hujjatlari ham mavjud bo`lmagan jami 5 717 quti ya`ni, 96 mln 737 ming so`mlik tovarlari olib qo`yilgan.
Andijon viloyatida mazkur yo`nalishda ishlar tizimli ravishda olib borilmoqda.
#Reklama huquqi asosida