Rossiya Ilm-fan vazirligi muhojirlar uchun rus tili imtihoniga og‘zaki qismni kiritish taklifini qo‘llab-quvvatladi. Bu haqda vazir o‘rinbosari Konstantin Mogilevskiyga tayanib, “TASS” xabar berdi.
“Rossiya Ta’lim va ilm-fan vazirligi mehnat muhojirlari uchun rus tili imtihoniga og‘zaki qismni qo‘shish bo‘yicha takliflarni qo‘llab-quvvatlamoqda. Shu bilan birga, ushbu takliflarni amalga oshirish uchun Imtihon o‘tkazish to‘g‘risidagi nizomga tegishli o‘zgartirishlar kiritish zarur”, deydi vazir o‘rinbosari.
Rossiyada 2014 yildan boshlab mehnat muhojirlari ishchi patenti, yashash guvohnomasi va fuqarolikni olish uchun rus tili, qonunchilik asoslari va mamlakat tarixi bo‘yicha imtihon topshirishi kerak.
2024 yil iyul oyida Ilm-fan vazirligi yanvar oyidan beri imtihon topshirmagan muhojirlar ulushi 10 barobarga oshgani haqida xabar bergandi.
Oxirgi 10 yil ichida Rossiyada mehnat muhojirlari soni ikki baravar kamaydi. Xususan, 2012-2014 yillarda mamlakatda bir vaqtning o‘zida 7 milliongacha chet elliklar ishlagan bo‘lsa, 2022-2023 yillarda ularning soni 3-3,5 milliondan oshmagan.
