Toshkent va Sirdaryo viloyatlarida qalbaki pullarni o‘tkazmoqchi bo‘lgan shaxslar ushlandi. Bu haqda Bosh prokuratura huzuridagi Departament xabar qildi.
Departamentning Bo‘ka tumani bo‘limi va IIB xodimlari hamkorligida Qibray tumani, “Yuqori yuz” MFY hududida o‘tkazilgan tezkor tadbirda fuqaro S.S. 100 AQSH dollarlik kupyuradagi qalbaki 3 200 AQSH dollarini fuqaro A.I.ga haqiqiy 1 000 AQSH dollariga sotgan vaqtida ashyoviy dalillar bilan ushlangan.
Departamentning Sirdaryo tumani bo‘limi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda fuqaro S.Z. va boshqalar tadbirkor Sh.N.ning “Bunyodkor” MFY hududidagi savdo do‘konidan xarid qilgan oziq-ovqat mahsulotlari uchun qalbaki 100 ming so‘mlik kupyurani bergan vaqtida ushlanib, ularning yonidan jami 1,3 mln so‘m qalbaki pullar ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishlari qo‘zg‘atilib, tergov harakatlari o‘tkazilmoqda.
