Toshkentda Inson huquqlari bo‘yicha O‘zbekiston Respublikasi Milliy markazining Axborot-resurs markazi negizida “Inson huquqlari uyi” o‘z faoliyatini rasman boshladi. Bu haqda Inson huquqlari bo‘yicha O‘zbekiston Respublikasi Milliy markazining matbuot xizmati xabar qildi.
Shu munosabat bilan Milliy markaz tomonidan O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi hamda Alisher Navoiy nomidagi O‘zbekiston Milliy kutubxonasi bilan hamkorlikda tantanali ochilish marosimi tashkil etildi.
Tadbirga faoliyati inson huquqlarini himoya qilish va huquqiy normalarni targ‘ib qilish bilan bog‘liq bo‘lgan xalqaro va mintaqaviy tashkilotlar vakillari, O‘zbekistonda akkreditatsiyadan o‘tgan diplomatik vakolatxonalar rahbarlari, ommaviy axborot vositalari vakillari, davlat organlari mutaxassislari, yetakchi ekspertlar, ilm-fan va jamoat arboblari – jami 100 nafar atrofidagi ishtirokchi hozir bo‘ldi. Bundan tashqari, “Inson huquqlari uyi”ning ochilishi tadbirini mamlakatimizning barcha hududlari markazlaridagi kutubxonachilar onlayn kuzatib bordi.
Qayd etilishicha, dunyo mamlakatlari Konstitutsiyalarida insonning 110 dan ortiq huquqi qayd etilgan bo‘lsa, bu huquqlarning 90 tasi yangi tahrirdagi O‘zbekiston Respublikasi Konstitutsiyasida mavjud va shu huquqlardan 40 tasi yangi konstitutsiyaviy huquqlardir.
Shu ma’noda, “Inson huquqlari uyi”ning rasmiy asosda faoliyat boshlashi ayni konstitutsiyaviy normaning ro‘yobga chiqarilishi bilan bog‘liq yirik amaliy tadbir hisoblanadi.
Tantanali ochilish tadbirining odatiy an’anasi – lenta qirqish marosimi o‘tkazildi. Ipak tasmani Inson huquqlari bo‘yicha O‘zbekiston Respublikasi Milliy markazidirektori Akmal Saidov, O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligi direktori Asadjon Xodjayev, BMTning O‘zbekistondagi Doimiy muvofiqlashtiruvchisi Sabina Mahl, Alisher Navoiy nomidagi O‘zbekiston Milliy kutubxonasi direktori Umida Teshaboyevabirgalikda qirqdilar.
